Avatangiisit & Silaannaap pissusaa

Pinngortitatta tunniussinnaasai inuiaqatigiinnut ullumikkut siunissamilu inuiaqatigiinni pingaarnersaasa ilagivaat. Suliniummullu aalajangiisuulluinnarpoq pinngortitamit piujuaannartumik pilersorneqarnissaq. Taamaattumik pingaaruteqarpoq suliniutip avatangiisinut klima-mullu sunniutigisinnaasai qulakkiissallugit misissussallugillu.

Annertuumik sanaartornissaq inuiaqatigiinnut, inunnut pinngortitamullu sunniuteqartussaavoq. Suliniullu piviusunngornissaanut aalajanginnginnermi pingaaruteqarpoq sunniutaasinnaasut pitsaasut akornutaasinnaasullu ersersinneqarnissaat. Taamaasilluni qulakkeerneqassammat pinngortitaq, avatangiisit inuiaqatigiillu eriagalugit suliniut piujuaannarnissaa. 

Pinngortitamik misissuinermi pingaaruteqarpoq nunarsuarmioqatigiinni periuseq akuerineqartoq atorneqarnissaa, aamma pingaartinneqarpoq inuiaqatigiit ammasumik ilaatinneqarlutik suliniut ingerlanneqarnissaa. 

Matumani atuarsinnaavatit suliniutimut atatillugu misissuititsinerit ingerlanneqarsimasut. Oqaaseq ‘avatangiisit' assigiinngitsorpassuarnik imaqarpoq, taamaattumik misissuinermi ilanngunneqarputtaaq isumaginninnikkut peqqissutsikkullu atugassarititat. 

Aluminiu pillugu suliniummi ilaavoq marlunnik erngup nukinga atorlugu nukissiorfiliornissaq, nukissiorfinniillu Maniitsumi aatsitsivimmut innaallagissap aqqutissai aammalu aatsitsivimmut atatillugu umiarsuarnut talittarfissaq. 

Suliniutip immikkoortortai tamarmik misissorneqassapput, misissuinerillu inerneri ataatsimoortumik nassuiaatitut Namminersorlutik Oqartussanut tunniunneqassapput suliniutip akuerineqannginnerani. Qanoq ingerlasoqarnissaa annertunerusumik atuarsinnaavatit Avatangiisinut Sunniutaasinnaasut Naliliiffigineqarneri-ni (ASN). 

Tamatuma saniatigut nassuiaatigineqarpoq suliniutip klimapolitikkimut attuumassuteqarnera, tamannalu ukiuni kingullerni politikikkut oqallitsitsinermi pingaaruteqarluinnalersimavoq. Aluminiumik tunisassiornerup oqallisigineqarneranut matumani pissutaavoq aluminiu sanaartuutissatut atornera aniatitsinermi annikillisaataammat, illuatungaatigullu aluminiumik tunisassiorneq annertuumik aniatitsinermik kinguneqartarluni. 

Aammattaaq atuarneqarsinnaapput Namminersorlutik Oqartussat pilersaarusiornermut atatillugu avatangiisinut nalilersuititsinerat (SMV), tassa politikkikkut aalajanginnginnermi avatangiisinut sunniutaasinnaasut eqqarsaatigalugit suliaq. Avatangiisinut nalilersuinermut siunertaavoq politikkikkut pilersaarusiornermi avatangiisit ilanngunneqarnissaat.