Sumiiffinni sunniutaasinnaasut

Sumiiffinni pineqartuni avatangiisinut sunniutaasinnaasut

Suliffeqarfiit sanaartorfiillu allat assigalugit aluminiuliorfik, erngup nukinganit nukissiorfiit aamma innaallagissap aqqutai pinngortitamut sunniuteqartarput. Saniatigut sanaartornerup ingerlanerani assigiinngitsunik sunniuteqartarput aamma sunniutit allanngortinneqarsinnaanngitsut suliffeqarfiit ingerlanneqarnerani.

Aluminiumik suliniut 2006-mi aallartimmat, Nunatsinni aluminiumik suliffeqarfiit pillugit ilisimasat annikitsuinnaapput. Taamaammat siullertut anguniarneqarsimavoq suliniutip, arlalinnik erngup nukinganit nukissiorfittaqartussap aammalu aluminiuliorfeqartussap, avatangiisinut sunniutigisinnaasaat.

Danmark-imi Avatangiisinut misissuisoqarfik, DMU, 2007-imi pineqartumut nalunaarusiorsimavoq uani aaneqarsinnaasumi. Nalunaarusiami erseqqissarneqarpoq immikkut inuiaqatigiit eqqumaffigissassaat, aammalu suliniutip avatangiisinut sunniutai nalunngineqartut.

Sunniutit assigiinngitsuusinnaapput, soorlu kuuk sunnerneqarsinnaavoq, akuutissanik aamma maligineqarsinnaasunik, soorlu nipiliornerulernikkut sunniineq. Aamma suliniut nutaap angallannikkut, innuttaasunut aammalu toqqaannanngitsumik sunniuteqarsinnaavoq.

Suut suliniutip sunniutigisinnaanerai aammalu naleqqiussinissamut tunngavissat paasitinnagit, paasissutissanik aalajangersimasunik ineriartortitsisoqartariaqarpoq. Allatut oqaatigalugu: Ullumikkut suliniutip piviusunngunnginnerani nuna pineqartoq qanoq ippa? Aatsaat massakkut pissutit ilisimaneqarpata "baseline" nalunaarusiamik sanasoqarsinnaavoq, suut suliniutip avatangiisinut sunniutigisinnaanerai, taavalu qanoq iliorluni sunniutit akornutaasinnaasut annikillisinneqassanersut. Nalunaarusiornermi suleriaaseq aalajangersimasoq atorneqassaaq, tassa Avatangiisinut Sunniutissanik Naliliineq (ASN).

Nalunaarusiaq innuttaasunut tusarniaassutigineqaqqaassaaq pisortanut akuerisassanngortinnagu nassiutinnagu.

Akuutissanik akornutaasinnaasunik aniatitsinerit killilersimanarneqarnissaat aammalu suliniutip najoqqutassatut killigititaat malinneqarnissaat nakkutigineqartuassaaq. Nakkutilliinissamut pissutit annertunerusumik atuarneqarsinnaapput massakkut pissutinik nalunaarusiami, ASN-ip immikkoortuani "Tunngaviusumik missuinerit...".