ASN
ASN - Avatangiisinut Sunniutinik Naliliineq (Vurdering af Virkninger på Miljøet - VVM)
Ingerlataq angisooq sunaluunniit ingerlanneqartussanngoraangat tamatigut annertuumik avatangiisinik misissuineqartarpoq, ilanngullugulu avatangiisinut sunniutissanik nalilersuineqartarluni taaneqartumik Avatangiisinut Sunniutinik Naliliineq - ASN (Vurdering af Virkninger på Miljøet -VVM). Pisortat aningaasaliisullu tungaannit tamanna pisariaqartinneqarpoq. Naliliinerimmi aalajangersunut tunngatillugu pilersaarutip sunniutigisinnaasai sunnersut paasineqarnissaat qularnaarniassavaat aammalu sunniutaasinnaasut ajoqusiisut qanoq ililluni pinngitsoorneqarsinnaallutilluunniit annikillilerneqarsinnaasut. Taamaattumik ASN-imut misissuinerit suliarilluagaasimanissaat pilersaarutip akuerineqarnissaanut apeqqutaaluinnartuuvoq.
Oqaaseq "avatangiisit" tassunga tunngatillugu assigiinngitsunik isumaqartillugu atorneqassaaq, tassani pinngortitaq, naasoqarneq uumasoqarnerlu kisimik pineqanngillat aammali inooqatigiinnermut, peqqinissanut inuaqatigiinnermullu tunngasut pineqarlutittaaq.
Tamatumunnga inuk ingerlatsivilluunniit (sanatitsisoq) misissuinerit ingerlanneqarsimanissaannut pissutsillu assigiinngitsut qulaajarneqarsimanissaannut akisussaavoq. Misissuinerit nammannersut pilersaarummilu tunuliaqutarineqartut naammaginartuunerannik illersorneqarsinnaanerannillu nakkutilliinissaq pisortat akisussaaffigaat.
Nunat assigiinngitsut tungaanniit pilersaarutit aalajangersimasut avatangiisinut sunniutigisinnaasaannik nalilersuineqarsimanissaa piumasaqaataavoq. Nalilersuutit aalajangersakkat tamanut atuuttut, piumasaqaatit, atorneqartarput aammalu nalilersuutit aalajangersut immikkut ittut pilersaarutinut issittumi ingerlatassanut tunngatillugu ineriartortinneqarnikuullutik.
Taamaattumik annertuunik misissuineqartussaavoq ilisimasanik pisariaqartinneqartunik annaasaqannginnissaq qularnaarniarlugu. Tamanna pisarpoq maleruagassat nunani tamani atuuttut amerlasuut tunngavigalugit, kisiannili aamma pisortat innuttaasullu qanimut suleqatigalugit. Taamaattumik ingertaq matoqqasuunngilaq, ingerlataallunili innuttaasunik peqataatitsiviusoq.
ASN-imik missuinerit suuppat?
VVM-undersøgelsenut inatsisitigut Kalaallit Nunaanni tunngavissaq nalunaarutinngorlugu atortussanngortinneqalerpoq. Suliap aallartinneqartup nunani allani aalajangersakkat tunngavigilereerpai, taassumalu Kalaallit nunaanni nalunaarutinngorumaartup allanngortinneqartarnissaa ilaneqartarnissaalu pisariaqartarumaarpoq.
Namminersorlutik Oqartussat aamma suliaqarsimapput pilersaarusiornermut atatillugu avatangiisit nalilersorneranik, ulluinnarni danskisut naalisarlugu SMV-imik taaneqartartumik (Strategisk Miljø Vurdering - SMV), qaffasinnerusumut tunngatillugu sulisussamik aammalu aammalu ASN-imut misissuinernut tunngatillugu sammimmisassat sorliit pingaarnerutinneqassanersut aalajangeeqataasartussaalluni.
Taamaalilluni ASN-imik misissuinerit:
- Ingerlatassap avatangiisitigut suut sunniuteqarfigisinnaasai tikkuartorlugillu nalilertartussaavai
- Innersussissalluni avatangiisinut sunniutaasinnaasut qanoq pinngitsoornianeqarsinnaasut/pinngitsoorneqarsinnaasulluunniit
- Misissuisarnissat qanoq annertutiginissaat qanoq akuttutigisumik pisarnissaat, pilersitseqqinnissaq aammalu qanoq ingerlatap uninneratigut avatangiisit qanoq isikkulerlugit qimanneqarnissaat nassuiaasiortussaavaa
- Pilersaarutip avatangiisiminut naleqqussarnissaanut peqataassalluni
- Naliliinini innuttaasunut pisortanullu saqqummiuttassallugit.
Tamanna pisinnagu, avatangiisnullu tunngatillugu akuersisoqareertinnagu, pilersaarut aallartinneqarsinnaanngilaq. Tamatumunngalu peqatigitillugu pilersaaruterujussuit ingerlatassat aningaasalersorneqarsinnaanissaannut tamanna aamma apeqqutaasussaavoq. Aningaasanik atukkiisartut aamma pilersaarutip nammineq avatangiisiminik qanoq sunniuteqarnissani uppernarsaasersorsinnaassagaa soqutigisaraat. Taamaalilluni avatangiisinut illersuinermut siumut ilisimariinngisanik aningaasartuuteqarsinnaaneq ulorianartua millisarneqarsinnaavoq. Aningaasalersuisussat tungaannit isigalugu amma ingerlatap allanngortitsisuunnginnissaa - avatangiisinuttaaq tunngatillugu - pingaartorujussuuvoq.