ASN-imik ingerlatsineq
ASN-ip ingerlanneqartarnera tallimanut immikkoortitaavoq. ASN-ip ingerlanneqartarnerani immikkoortuni tamani soqutigisallit ilaatinneqartarnerat pingaarutilimmik ilaavoq. Ingerlatsineq nammineq suunerata erseqqinnerusumik nassuiarneqarnera misissuinissamut pilersaarummi (Terms of Reference - ToR) takuneqarsinnaavoq. Immikkoortuni tamani tunngavigineqarpoq annertunerusumik ilisimasaqarneq, taamaalilluni, misissuinissat suunerinik aalajangersaanermi kingornatigullu sunniutissanik nalilersuinermi nalunaarutissatut missingersuut avammut tusarniaassutigineqarsinnaassalluni.
ASN-ip ingerlanneqarnerata ilaatut misissuinissanut aalajangersunut tunngasut avammut tusarniautigineqarnikuupput taavalu Sisimiuni, Maniitsumi Nuummilu 2009-mi januarmi innuttaasunik ataatsimisitsinerni saqqummiunneqarlutik. Ataatsimiinnerni innutaasut pilersaarummut misissuinernullu tunngatillugu oqaaseqarnissamut itisilerutaasunillu apeqquteqarnissamut, aammalu allannguutaasinnaasunik ilassutissanillu siunnersuuteqarnissamut periarfissaqarput. Taannattaaq Namminersorlutik Oqartussat oqartussaaffiinut suliamut attuumassuteqartunut, kommuninut kattuffinnullu soqutigisaqartunut tusarniaassutigineqarsimavoq.
Suliap ingerlanera tamaat innuttaasut ataatsimiitinneqartarnerisigut toqqaannartumillu soqutigisaqartunik kattuffinnilu ataatsimeeqateqartarnikkut innuttaasut ilaatinneqartuarput (Asseq: Greenland Development)
Tamatuma kingornagut misissuinerup nalaani pinngortitamut, avatangiisinut, itsarnisarniornermut, peqqinnissamut innoqatigiinnikkullu pissutsinut tunngatillugu misissuinerpassuit (baselinestudie-nik taaneqartu) ingerlanneqarsimapput. Tamakkunuuna siunertarineqarpoq sukumiisumik sunnerneqartussap nassuiaateqarfiginissaa aamma ullumikkut pissusiusunik - imaappoq pilersaarut aallartitsinnagu - nassuiaanissaq. Misissuinerit 2009-mi ukiakkut naammassineqarput. Misissuinerni angusat pingaarnerit 2010-mi januarimi innuttaasunik ataatsimiititsisarnertigut saqqummiussuunnearput. Paasisat katersorneqartut immikkut naqitanngorlugit saqqummiutassaanngillat, atorneqassallutilli sunniutaasussanik nalilersuinermi, tassunna pilersaarutip sunik sunniuteqarnissaa nassuiarlugulu nalilersorneqassammat.
Immikkoortumi tulliuttumi nassuiarlugulu nalilersorneqassaaq pilersaarut sunik sunniuteqarumaartoq, missingersorneqassallunilu sunniutissat pingaarnerusut qanoq iliorluta illuatungilersinnaassanerigut. Taamaaliornissamut apeqqutaasussaavoq pilersaarutip teknikikkut ilusaata allanngortinneqannginnersoq, tassami pissutsit annertussutsimut teknikikkullu pissutsisut ittut takussaasumik sunniuteqarnerup, nalilersorneqartussap, qanoq ittuunissaanik aalajangiisuusarmata.
Ingerlatsinermi immikkoortutut kingulliusussaavoq avammut saqqummiussineq, tassani innuttaasut tassuuna, nalunaarusiamut inaarutaasumut missingersuut avatanngisinut oqartussaqarfimmut nassiunneqartinnagu ilatigut innuttaasut ataatsimiitinneqartarnerisigut inerniliutaasut oqaaseqarfiginissaannut periarfissaqassallutik.
ASN-imik misissuineq inaarutaasumik oqartussaasunit akuerineqareerpat taava sunniutissanut, nalunaarsuinissanut pissutsinullu allanut tunngatillugu pissutsit pilersaarummut tamarmiusumut sanaartugassanut ingerlatassanullut ilanngussuunneqassapput. Pilersaarutit tamakkua suliarineqarumaarput oqatussaasut suliamut attuumassuteqartut suleqatigalugit. Ingerlatat ilaannut arlalinnut tunngatillugu pilersaarutip ingerlanera tamakkerlugu nakkutilliineqartuartussaavoq