Itsarnisarsiorneq
Aluminiuliorfiliornissamik pilersaarummut ilanngullugu itsarnisarsiorluni misissuineqarlunilu alakkarterineqartussaasoq. Alakkarterinerit tamakkua VVM-undersøgelsimut ilaasarput tamaani sunik kulturikkut pingaarutilinnik peqarnersoq tamakkualu qanoq pilersaarummit sunnerneqarsinnaanersut paasiumallugu. Kulturikkut eriagisassat paasissutissallu tamakkunaniittut Inatsisartut kulturikkullu eriagisassat eqqissisimatitaanerat pillugu inatsisaatigut nr. 18, 19. november 2007-imeersukkut illersorneqarput. Inatsit taanna VVM-imut tunngatillugu ingerlatanit suli annertunerusumut atuuppoq. Aammalumi pilersaarusiornermut atatillugu avatangiisit nalilersuinermut - SMV-mut, itsarnisarsiorneq ilaavoq.
Inatsisip eriagisassat ataasiakkaaginnaat illersunngilai, aammali sanaartugaasarsimasut, nunaqarfiusimasut, attakoqarfinnut aammalu nunap ilarujussuinut soqutiginaatillinnut atuulluni. Tamakkua tassaasinnaapput illukoq attakoqarfittalik, siornatigut naggorissaanikkut ingerlatsiviusimagaluartut imaluunniit nunap ilai kulturikkut oqaluttuarisaanikkut nunaqarfiusimasumut tunngatillugu soqutiginaatillit.
Nunap ilaa kulturikkut oqaluttuarisaanerup tungaatigut paasiniaavigineqassappat siulliullugu Kalaallit Nunaata Katersugaasiviani toqqortarineqartutigut paasissutissat naleqqiussuunneqartariaqarput. Tulliuttorlu tassaasarpoq peqarfimmi alakkarterinerit, nunap assiliorneq kulturikkullu eriagisassanik nalilersuineq. Pingajuallu tassaavoq sanaartorfissaq kulturikkut eqqaassutissanik aqqusarisussaatillugu tamaani itsarnisarsiorluni kulturikkut eqqaassutissanik misissuineq (assaanerit).
Kalaallit Nunaata Katersugaasiviata suut alakkarterneqassanersut kingornatigullu suut assaavigineqassanersut aalajangertarpaa. Sanaartorfissat imaluunniit ingerlatat tamakkua kulturikkut eqqaassutissanik aseruisussanersut qanorlu iliorluni paasissutissat tamakkua pitsaanerpaamik kinguaassanut toqqorneqarsinnaanersut Kalaallit Nunaata Katersugaasiviata aalajangertarpaa. Amerlanerpaatigut tamanna assaanerit atorlugit pisarpoq. Allatut ajornarluinnartillugu iluatinnartoq navianartorsiorfia qimatillugu allamut immaqa nuunneqarsinnaassaaq.
Kalaallit Nunaata Katersugaasiviata misissuinerni paasissagaluarpagu pingaaruteqarluinnartuusoq, taava attuumassuteqartunut pisortanullu attuumassuteqartunut toqqaannartumik tamanna nalunaarutigineqassaaq
Tasersiaq - itsarnisarsiuisunit misissuiffigineqarpoq allaaserineqarlunilu (Asseq: Greenland Development)
Tamaattumi itsarnisarsiornikkut nalunaarsukkanut (assaanernut) atatillugu aningaasartuutit tamarmik pilersaarummik ingerlatitsisuusumit akilerneqartussaapput.
Kattuffiit, ingerlatsiviit inuillu ataasiakkaat tamarmik pisinnaatitaapput nunap ilaata taamaaqataataluunnit allap eqqissitinneqarnissaanik Kalaallit Nunaata Katersugaasivianut inassuteqarsinnaatitaapput. Eqqissisitsinissamut tunngatillugu maalaarutaasinnaasut Naalakkersuisunut tunniunneqarsinnaapput taavalu maalaarut Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmit suliarineqarumaarpoq.
Kalaallit Nunaata Katersugaasiviata aluminiuliorfissap imeq atorlugu nukissiorfiliorfissamut piukkunnartunut marlunnut tunngatillugu nalunaarutaata 2009-mi majimeersup kalaallisut naalisarnera uani aaneqarsinnaavoq, imaluunniit tamakkiisumik tuluttut uani aaneqarsinnaavoq. Kalaallit Nunaata Katersugaasiviata kulturikkut eqqaassutissanut sulianullu allanut tunngatillugu suliai uani atuarneqarsinnaapput.