Aluminiuliorfiup inissinnissaanut tunuliaqut

Januar 2007-imi Inuussutissarsiutinut Suliffeqarnermullu Naalakkersuisuusup Siverth K. Heilmannip taamanikkut Nuup, Maniitsup Sisimiullu kommunii qinnuigai aluminiumik suliniutissatut siunnersuut kajumerineritsik isumaliutigeqqullugu. Kommunit pingasut tamarmik soqutiginnillutik nalunaarput kingornalu aluminiuliorfissatut siunnersuutip inissiffigisinnaasaannik toqqaaqquneqarput. Piareersaatinut ilaatillugu kommunini naalakkersuinikkut aqutsinikkullu siuttut Islandip kangisissuanut angalapput tassani aluminiuliorfissaq erngullu nukinganit nukissiorfissaq sanaartorneqartut takuniarlugit.

Aluminiuliorfiup inissinnissaanut suliniummi piumasaqaatit kissaatillu imatut isikkoqarsimapput:

• Nunaminertaq 140 hektarit (0,8 x 1,5 km) missaannik angissusilik sanaartorfissamut atatillugu manikannersoq. Tamatuma saniatigut nunaminertaq 200-300 hektar (bufferzone) aluminiuliorfik ungatangerlugu.
• Inissiiffissatut toqqakkap qanittuani sulisut 2000 pallillugit amerlassusillit najugaqarfigigallagassaat pilersinneqarsinnaassaaq.
• Imeq pissarsiarineqarsinnaassaaq.
• Sissiugaq itisooq (minnerpaamik 16 meterinik itissusilik minnerpaamillu 300 meterinik takissusilik) sikuneq ajortoq pilersinneqarsinnaassaaq.
• Inissiiffik, illoqarfimmut naatsumik aqqusineqarsinnaasoq ikaartaatilerneqarsinnaasorluunniit.

Kommunit taakku pingasut tamarmik immikkut inissiiffiusinnaasunik soqutiginartunik eqqarsaatigilluakkanillu saqqummiussipput. Maniitsumi Sisimiunilu kommunit siunnersuutaat innuttaasut ataatsimiissinneqarneranni oqaluuserineqarput kingornalu taakkunani oqaaseqaatigineqartut tunngavigalugit naleqqussarneqarlutik.

Tamanna tunngavigalugu inissiiffissatut kommunit toqqagaat Alcoamut tunniunneqarput 2007-imilu upernaap aasallu ingerlaneranni taakku tamarmik tassannga misissorneqarlutik. Tamatuma kingorna periarfissat amerlassusii ikilisarneqarput suliniummi teknikkikkut mianerisassat aallaavigalugit.

Aluminiuliorfissap sumiiffissaatut suliniummi inaarutaasumik siunnersuut killikkumallugu siunnersuutit sinneruttut immikkuualuttortalersorlugit misissorneqarput. Toqqaanermi pissutsit makkununnga tunngasut pingaartinneqarput, soorlu teknik, aningaasaqarneq, naammattusaarineq, erngup nukinganit nukissiorfiit inissinnissaat, innaallagissap aqqutaata ingerlaviat kiisalu avatangiisitigut mianerisassat. Tamatumunnga peqatigitillugu Namminersornerullutik Oqartussat 2007-imi Pilersaarusiornermut atatillugu avatangiisit nalilersorpaat, sulimiummilu teknikkikkut eqqarsaatigisassat apeqqutaatinnagit avatangiisitigut mianerisassat inissiinissamullu atatillugu naalakkersuinikkut isummerfigisassanut attuumassutillit ilanngussaqarfigalugit.

Aningaasarsiorneq/teknik eqqarsaatigalugu pitsaanerpaamik inissiinissaq aaqqiissutissarlu avatangiisinut nunallu immikkoortuanut naalakkersuinikkut isumannaatsuugunartut ajunngitsumik imminnut naapertuupput. Inatsisartut 2008-mi upernaakkut ataatsimiinnermi ataatsimut isumaqatigiipput Maniitsumi 'site C'-p inissiiffissatut toqqarneqarnissaa pillugu suliniummi Naalakkersuisullu inassuteqaataat akuersaarneqassasoq.

Inissiiffissatut kommunit pingasut siunnersuutaat siulliit tamaasa takusinnaavatit uani.