Nunarsuarmi tamarmi aluminiu piumaneqarpoq
Aluminiu tunisassiaq arlaleriarluni atoqqinneqarsinnaavoq. Taamaattumik tunisassiat aluminiumik akullit atorneeruttut katersortarnissaat aamma pingaaruteqarpoq, taakku tunisassiani allani atorneqarsinnaammata. Atoqqiinermi avatangiisit eqqarsaatigalugit iluaqutissaq annertuvoq, ilaatigut pissutigalugu aluminiu atoqqitaq (aluminiukoq) tunisassiarissagaani aluminiup aluminiuliassamit pisup (aluminiuiup) pilersinnissaanit nukip taamaallaat 1/20-iata missaa atorneqartussaammat.
Taamaattorli aluminiu atoqqitassaq pissarsiarineqarsinnaasoq piumaneqarneranut naleqqiullugu naammanngilluinnarpoq.
2000 - 2009-mut aluminiuimmik atuineq agguaqatigiissillugu ukiumut 3,8 %-imik qaffariaateqartarpoq. Aatsitassalerinermi misissuisartut (marts 2010) naatsorsuutigaat kisitsit 2010-2020-mut ukiumut 4,3%-imik qaffariassasoq.
Aluminiup sumut atorneqartarnera annertunerusumik atuaruk uani.
Nunarsuarmi aningaasarsiornermut attuumassutaa
Sisak, kanngussak savimerngillu allat assigalugit aluminiu nunarsuarmi niuernerup nikittarneranit sunnerneqaqqajaasorujussuuvoq. Nunarsuarmi aningaasarsiorneq 2006 - 2008-mut annertusimmat aluminiu piumaneqartorujussuuvoq akillu qaffariartuinnarnissaat iluanaarniutigineqalerluni. Nunarsuarmi aningaasarsiorneq 2008-09-mi kinguariarmat aluminiup piumaneqarnera tassaanngaannartumik sakkortuumillu appariarpoq. Taamani tunisassiorneq tamatuma sukkaqataanik appariartinneqarsinnaanngimmat savimerngit sippulimmik pigineqalerput, pissamaateqarnerlu qaffariaqaluni, aluminiulli akia appariarujussuarluni.
Tamatuma kingunerisaanik aluminiumik niuernerup ilarujussua amigartooruteqarfiulerpoq aluminiuliorfiillu arlallit matugallartariaqarlutik maluittariaqalerlutilluunniit.
2010-p ukiuata affaani siullermi nunarsuarmi aningaasarsiorneq kigaatsumik pitsaanerulermat aluminiu kingumut piumaneqarnerulerpoq. Aluminiup akia taamaalilluni qaffariaqqippoq aluminiumik niuerneq sinneqartoorfiulerluni.
Aatsitassalerinermi misissuisartut naatsorsuutigaat 2010-mi aluminiuimmik tunisassiornerup 2007-mi qaffasinnerpaaffik qaangissagaa tamatumalu kingorna aluminiup piumaneqarnera assigiiaammik qaffariartulissasoq. Taamaalilluni ukiut arlaqanngitsut ingerlaneranni aluminiuliorfiit nutaat sanaartornissaat pisariaqartinneqaqqilissaaq.
Amerleriaat niuerfinnut nutaanut pissaaq
Nunat siuarsimasut soorlu USA aamma Europap Kitaa aluminiumik atuisorujussuupput, innuttaasup ataatsip ukiumut atortagaa 25-30 kg missaaniilluni. Aatsitassalernermi naatsorsueqqaarnerit tunngavigalugit nunat suliffissuaqarfiusut aluminiuimmik atuinerata ullumikkut atuineq qaangissanngikkaat naatsorsuutigineqarpoq. Tassa oqartoqarsinnaavoq taakku "qaarsillarfissartik" angusimagaat, illua'tungaanilu nunat siuarsagaannginnerpaat taamatut annertussusilimmik aluminiussaaleqinissaat suli tunngavissaqanngitsoq.
Nunat amerlasuut - soorlu Kina Indialu - suliffissuaqarnermik annertusaallutik aallartereersut - aluminiumik atuinerat sakkortuumik annertusiartorpoq, siunissamilu aluminiumik pissaqarniarnermut pingaaruteqaleriartussallutik.
Nunarsuarmi tamarmi aluminiumik tunisassiorneq atuaruk uani.