Aluminiuliorfiup inissiffissaatut siunnersuut
Aluminiumik suliniutip aallarnersarnerani aluminiuliorfiup kujammut Nuummiit avannamut Sisimiut tikillugu inissiffigisinnaasai arlallit saqqummiunneqarput. Inissiinissaq pillugu aalajangiinissaq sioqqullugu teknikkimut avatangiisinullu tunngasunik aallarniutaasunik misissuissoqarpoq, inissiiffissat sorliit ataatsimut isiginnilluni suliniummut avatangiisinullu pitsaanerpaamik atugassaqartitsisussat ersersikkumallugit. 2007-imi upernaakkut aalajangiunneqarpoq Maniitsup qeqertartaani inissiisinnaaneq suliaralugu ingerlateqqinneqassasoq. Avatangiisinut teknikkimullu tunngasut saniatigut erngup nukinganit nukissiorfiusinnaasut tungaannut ungasissuseq aamma pingaaruteqarpoq. Naak Maniitsup aqqa eqqarsaatigineqarsinnaagaluartoq nuna inissiiffissatut toqqagaq maningaatsiarpoq.
Nuna aluminiuliorfissap inissiffissaattut siunnersuutigineqartup eqqaa (Asseq: Greenland Development)
Inissiinissaq pillugu aalajangiinermut atatillugu misissugassat ataasiakkaat aallartinneqarsinnaassimapput, tassa suliniut najukkamilu angallannikkut annertusaanissat qanoq suliarineqarnissaannut tunngasut kiisalu aluminiumik suliniutip najukkamilu inuiaqatigiit akornanni ataneqarnissaq pillugu misissuinerit qanoq iliorluni aallartinneqassanersut.
Maniitsoq aluminiuliorfissallu inissiffissaattut siunnersuut (Assi: Maniitsup Kommunea)
Maniitsup qeqertartaani aluminiuliorfimmik inissiineq illoqarfimmiunut qanittumiissaaq. Inissiinermut atatillugu Maniitsup illoqarfianiit aluminiuliorfimmut aqquserngiortoqassaaq. Aqquserngiassap qanorpiaq ingerlaveqarnissaa ilusilernissaalu suli isumaliutigineqarpoq, 11 km-inilli takissuseqarnissaa naatsorsuutigineqarpoq.
Aluminiuliorfik illoqarfimmit naleqquttumik ungasissuseqassaaq, sulisut ajornanngitsumik pilertortumillu tassunga tassanngalu ingerlasinnaassallutik, aluminiuliorfik illoqarfimmit malugineqarsinnaassanani. Tamanna imatut pissuseqassaaq, tassalu illoqarfik suliffissuarlu qaqqamik akunneqassapput tamatumalu saniatigut aluminiuliorfik nammineq sissiugaqassalluni tunisassiassat tigoorarnissaannut inerlugillu tunisassiat umiarsuarnut usiliussuunnissaannut kiisalu assartuutit oqimaatsut allat eqqarsaatigalugit.
Aluminiuliorfik inissinneqassaaq nunami qaartiterinissaq sapinngisamik annikitsuutinniarlugu, sissiugassamulli qanittumiissalluni. Aluminiuliorfimmi annertunerpaamik takussaassapput illorsuit takisuut aatsitsiviit marluk. Assip saamia'tungaata isorpiaaniippoq innaallagissamut naleqqussaaveqarfik (transformerstation), tassani erngup nukinganit nukiliorfimmiit sarfaq sakkortooq ataatsimut ingerlaarfeqalersinneqassalluni aatsitsivinnullu atugassatut naleqqussarneqassalluni. Assimi qullerpaavoq sissiugaq silonut ingerlatsitsivittalik (transportbånd) taakkunanilu aluminiuliassaq tunisassiassallu allat toqqortarineqartassapput. Silot aatsitsiviillu akornanniippoq kuitsiveqarfik, tassanilu savimineq imerpalasoq ilusilerneqartarpoq tunisassiamut inerlugu suliaasumut. Aammattaaq assigiinngitsunik sannaveqartiterpoq, allaffeqartiterluni il.il. (Alcoa -mit takussutissiaq)
Tamatumunnga peqatigitillugu aluminiuliorfimmut aqqusineq aamma "illoqarfiup immikkoortuanut nutaamut" qeqertap kangisissuani Maniitsup illoqafiata avannaani inissisimasumut aqqutaassaaq.
Aammattaaq aqqusineq taanna Ataani inuussutissarsiutit nutaat pilersinnissaannut periarfissiissaaq.
"Illoqarfiup immikkoortua nutaaq" massakkut illoqarfiusumit avinngarusimassaaq nunap qanoq issusia pissutaalluni, taamaakkaluartorli aluminiuliorfiup illoqarfiviullu akornanni ataneqartitsisuussalluni.
Qeqqata Kommunia suliniutinik arlalinnik aallartitsivoq illoqarfiup immikkoortuata nutaap ilusilernissaanut innuttaasut namminneq takorluugaat pilersaarusiornermi ilanngunneqartussanngorlugit. Tamatuma saniatigut Qeqqata Kommunia Namminersorlutillu Oqartussat suleqatigiipput angallannikkut annertusaanissat tamarmiusut Maniitsullu alliartortinnissaanut periarfissat misissorlugit.