Suliniummi nukissiornissamut periarfissat
Aallaqqaataanniit aluminiumik suliniummut atatillugu sumiiffiit tallimat, erngup nukinga atorlugu nukissiorfissatut Nuup Kangerluaniit Kangerlussuarmut, piukkunneqarput.
Periarfissat marluk suli misissuinerit aallartinnginneranni 2007-mi unitsinneqarput. Ilimanaateqarnerpaat pingasut itinerusumik nalilersorneqarput, aluminiuliorfimmut sarfamik 600-niit 750-it MW-it tungaanut pilersuisinnaasussatut. Ilimanaateqartut tassaapput Tarsartuup Tasersua, Isortup Isua kujalleq aamma Tasersiaq.
Misissuinerit tunngavigalugit suliniummik ilusilersukkamik pilersaarusiortoqarpoq, ilanngunneqarlutik saputit, sullorsuit, aqquserngit innaallagissallu aqqutaat. Qanoq annertutigisumik erngup nukinga atorlugu innaallagissamik pilersitsisoqarsinnaanersoq, erngup pissusaanik uuttortaanermi sumiiffinnilu misissuinerni, aalajangerneqarsimavoq.
Misissuinerit Isortup Isuani kujallermi 2008-mi unitsinneqarput. Pingasunik peqquteqarpoq:
- Naatsorsuutigineqarmat sumiiffiit allat marluk pineqartut katillutik sarfamik naammattumik aluminiuliorfimmut pilersuisinnaammat.
- Qangaaniilli paasissutissat katersorneqarsimasut sumiiffiit allat marlunni pitsaanerummata. Taamaasilluni Isortup Isuani kujallermi periarfissat annertussusaat naatsorsoruminaallutik.
- Isortup Isuani kujallermi nunap tikikkuminaannera peqqutigalugu, itinerusumik naliliinngikkaluarluni takuneqarsinnaammat sanaartornissamut aningaasartuutissat annertunerussasut.
Taamaattumik 2008-mi 2009-milu erngup nukinganit nukissiorfiliornissamut misissuinerit sumiiffinnut marlunnut pisimapput, tassa Tarsartuup Tasersua aamma Tasersiaq, saniatigut ilanngullugu misissorneqarpoq innaallagissap aqqutigisinnaasai.