Nunatsinni erngup nukinganik nukissiorfiit
Utoqqarmiut Kangerluarsunnguanni erngup nukinga atorlugu nukissiorfik
Utoqqarmiut Kangerluarsunnguani nukissiorfik nunatsinni erngup nukinga atorlugu nukissiorfiit siullersaraat 1993-milu atulerneqalerluni. Nukissiorfittavia qaqqap iluani 600 meteritut ititigisumiippoq, nukissiorfiullu tungaanut tatsimiit 14 km-itut takitigisumik sollorsuaqarluni. Nukissiorfiup Nuuk sarfamik pilersorpaa, sarfarlu taanna sarfamik naliginnarmik pilersuinerup saniatigut kiassarnermut aamma atorneqarpoq.
Utoqqarmiut Kangerluarsunnguani nukissiorfik pingasunik sarfaliuteqarpoq (qallunaatut turbine-nik taaneqartartunik), taakkulu illoqarfik 45 MW = 45.000 kilowatt = 45.000.000 watt-inik pilersorlugu.
Sarfaliutit pingajuat aatsaat 2008-imi atulersinneqarpoq, tamatumalu kingunerisimavaa 15 MV-imik pilersuinerusinnaanngorneq - taamaasilluni illoqarfimmut sarfamik pilersuineq 45 MW angullugu.
Utoqqarmiut Kangerluarsunnguani nukissiorfiup isaariaa (Ass. Nukissiorfiit)
Tasiilami erngup nukinganik nukissiorfik
Tasiilami erngup nukinga atorlugu nukissiorfik pisortatigoortumik 2005 upernaani ammarneqarpoq, taamaasillunilu illoqarfimmik erngup nukinga atorlugu sarfamik pilersuisut tulleralugu. Nukissiorfik Tasiilap eqqaaniittoq illoqarfimmit 3 km-init ungasitsigisumi inissisimavoq illoqarfillu sarfamik 1,2 MW-tut annertutigisumik pilersorpaa.
Tasiilami erngup nukinga atorlugu nukissiorfiup illoqarfik sarfamik naliginnarmut atugassamik pilersorpaa, kiassarnermut sarfaliinissamik naammattumik sarfaliorsinnaanngimmat.
Tasiilami nukissiorfiup silataani (Ass. Nukissiorfiit)
Qorlortorsuarmi erngup nukinga atorlugu nukissiorfik
Qorlortorsuarmi erngup nukinga atorlugu sarfaliorneq 2007/08 ingerlanerani atulersinneqarpoq, illoqarfiillu Qaqortoq Narsarlu sarfamik pilersorpai. Taamaasilluni nukissiorfik taanna siullersaavoq illoqarfinnik arlalinnik ataatsikkut sarfamik pilersuisutut.
Erngup nukinga atorlugu nukissiorfik marlunnik sarfaliuteqassaaq, taakkulu illoqarfiit taaneqartut marluk 7,2 MW-itut annertutigisumik pilersugaralugit. Qaqortumi nalinginnaasumik sarfamik pilersuinerup saniatigut illoqarfik kiassarnissaannut aamma sarfamik pilersugarivaa, kisiannili Narsami kiassannermut pilersussalluni naammattumik sarfaliorsinnaanani.
Qorlortorsuarmi nukissiorfik orpikkat akornanniit isigalugu (Ass. Nukissiorfiit)
Sisimiut eqqaani erngup nukinga atorlugu nukissiorfik
Erngup nukinga atorlugu Sisimiut eqqaani nukissiorfik 2009-ip naalernerani pilersuilluni aallartippoq, marlunnik sarfaliuuteqarpoq (turbin-it) katillugu 15 MW-itut annertutigisumik pilersuisinnaallutik. Nukissiorfik Sisimiunut kiassarnermut aamma sarfamik pilersuivoq. Taseq Tasersuaq nukissiorfiup sarfaliorneranut atorneqarpoq, tamannalu illoqarfiup avannaata kangiatungaani 27 km-isut ungasitsigisumi inissisimalluni.
Sisimiut eqqaani nukissiorfik (Ass. Nukissiorfiit)
Ilulissat eqqaani erngup nukinga atorlugu nukissiorfiliornissaq.
2010 aallartilaarnerani Ilulissat eqqaani erngup nukinga atorlugu nukissiorfiliornissaq pillugu isumaqatigiissusiortoqarpoq, naatsorsuutigineqarporlu nukissiorfissap Ilulissat avannaata kangiata tungaani 52 km-isut ungasitsigisumi inissisimanissaa. Nukissiorfik naatsorsuutigineqarpoq 2013-imi naammassineqarnissaa, sarfaliuutillu pingasut atorlugit naatsorsuutigineqarluni 22,5 MW-itut annertutigisumik pilersuisinnaanissaa.
Ilulissat eqqanni nukissiorfissap inissinnissaanut pilersaarut (Ass. Nukissiorfiit)