Tarsartuup Tasersua
Tarsartuup Tasersua Nuup Maniitsullu akornanni inissisimavoq avannamut/kujammut sammivilimmi illoqarfiit taakku marluk 120 km missaanni kangianiilluni. Taseq taanna kangimut isuani iigartartumit sermip aaneranit imilersugaaneruvoq. Imaappoq tatsip ernga sioraaqqanik iigartartumit pisunik akoqarpoq avatangiisillu misissorneranni taseq aalisagaqanngitsutut paasineqarluni. Taseqarfissaq arlariinnik tasertaqarpoq taseq anneq tassaalluni Tarsartuup Tasersua allalu mikineq kujasinnerusumiilluni, erngup nukinganit nukissiorfissamut sulluliassap aallaaveqarfissaa. Sulluliassaq 10 km missaanni takissuseqassaaq nukiliorfimmullu anillaffeqassalluni Nuup Kangerluani Anavimmi qaqqamut sullillugu qaartiterlugu inissisimasussamut.
Tarsartuup tasersua (Ass: Greenland Development)
Suliniummi sanaartugassanut sapusiassat arfinillit tikillugit ilaapput, taakkunannga portunersaat 32 meter missaaniissasoq naatsorsuutigineqarpoq. Ikerasaliat pingasuussapput takinersaat 720 meter missaanni takissuseqassalluni sulluliallu pingasuussallutik takinersaat 2 km missaanni takissuseqassalluni.
Tarsartuup Tasersuata erngata qaffatsinnissaanut pissutaanerpaavoq taseqarfissap angisuutinnissaa: Taseq angineruppat itineruppallu imeq naammattumik annertussusilik ukiukkut aamma sulluliakkoortinneqarsinnaassaaq, tatsillu imartussusia sillimmataassaq ukiut ilaani issinneruffiusuni panerneruffiunerusunilu imeq sialummit sermillu aaneranit pisoq annikilleriassagaluarpat. Sulluliat ikerasaliallu erngup tatsinit mikinerusunit Tarsartuullu Tasersuata timaanit pisup kuufissaattut atorneqassapput taamaalillunilu taseqarfissap angissusia annertusitinneqassalluni.
Taseqarfiit nukissiornermut atorneqartussat (Ass. Alcoa / PB Power)
Tatsip erngata qaava annerpaamik 20 meterinik qaffatsinneqarpat tatsip qaavata angissusia annertunerpaafissamigut 95 km2 missaaniilissaaq.
Tarsartuup Tasersuata nukimmik pilersitsisinnaassusia naatsorsuutigineqartoq : 175 - 200 MW. Tarsartuup Tasersua taamaalilluni Tasersiamit mikinerujussuanngussaaq, taamaakkaluartorli Islandimi erngup nukinganit nukissiorfiit anginerpaartaarta tulliatut, Hraunayjafossitut, angissuseqassalluni nunatsinnilu Utoqqarmiut Kangerluarsunnguanni erngup nukiliorfiit annersaanit sisamaneriaammik angissuseqassalluni.
Itsarnisarsiorneq:
Tarsartuup Tasersua qangarsuaq kalaallit aasami aavartarfissuaraat tatsillu sinaani nassaassarpassuaqarpoq tamaani tuttunniat inuunerannik takussutissanik. Tasersiap aamma Tarsartuup Tasersuata eqqaani itsarnisarsiornikkut misissuinerit pillugit annertunerusumik atuarit uani imaluunniit Nunatta Katersugaasiviata nittartagaani.
Ujarassuarni, nukiliorfissap qaqqap innaata iluani inissinneqarfissaatut naatsorsuutigineqartumi, 'Anavik'-mi qallunaatsiaat illukui pingaarutillit ataatsimoortillugit illuliat piupput. Taamaattumik nukissiorfiup inissinneqarfissaatut siunnersuut toqqarneqartorlu itsarnisaqarfimmit ungavarlugu inissinneqassasoq siunnersuutigineqarpoq.