Tasersiaq
Tasersiaq Kalaallit Nunaanni tatsit takinersaraat Kangerlussuarmiillu 100 km missaanni kujasissusilimmiilluni. Tatsip qaava 682 meter missaanni qaffasissusilimmiippoq. Qaqqanit portusuunit avatangerneqarsimanini pissutigalugu nuna tamaani kooqarfiusoq annikitsuinnaavoq. Tasersiaq iigartunit tatsip kangisissuani kujasissuanilu inissisimasunit imertaqartinneqarneruvoq. Imaappoq tatsip ernga sioraaqqanik iigartartunit pisunit akulerujussuuvoq taamaattumillu aalisakkanit uummaffigineqarsinnaannani.
Nuki sapinngisamik annertunerpaaq iluaqutiginiassagaanni Tasersiap ernga kujammut kimmut sammisumik ingerlaarfilerneqartariaqarpoq sulluliaq 30 km missaanni takissusilik atorlugu Kangerluarsussuup qinnguani erngup nukissiorfimmut atanilerlugu.
Tasersiaq (Ass. Greenland Development)
1970'kkunni ingeniørit misissuineranni takorloorneqarsimavoq kuuk avannamut kimmut Arnangarngup Qooruanut, Kangerlussuarmi paalimmut, kuuttoq atuarlugu sulluliortoqassasoq.
Taamatuttaaq pinngortitaq mianeriniarlugu teknikkillullu periarfissat tunngavigalugit Kangerlussuatsiap tungaanut sulluliortoqarnissaa kajungerineqarpoq. Taamaalilluni Arnangarngup Qoorua eqqissisimatitaq ataavartussanik sanaartorfigineqassanngilaq sulluliarlu naanerussaaq taamatullu tatsip aamma erngup nukissiorfiup akornat sivinganerussalluni.
Suliniummi sanaartugassanut ilaassapput sapusiat marluk, taakku portunersaat 37 meter angullugu portussuseqassagunarpoq.
Tasersiap erngata qaffatsinnissaanut pissutaanerpaavoq taseqarfissap angisuutinnissaa: Taseq angineruppat itineruppallu imeq naammattumik annertussusilik ukiukkut aamma sulluliakkoortinneqarsinnaassaaq, tatsillu imartussusia sillimmataassaq ukiut ilaani issinneruffiusuni panerneruffiunerusunilu imeq sialummit sermillu aaneranit pisoq annikilleriassagaluarpat. Tatsip misissorneqarneranissaaq paasinarsivoq sumiiffiit ataasiakkaat ikkattuararsuusut.
Taseqarfissaq ulikkaaqatillugu tatsimiit kangerlummut nakkariarfik 709 meteriussaaq. Tatsip qaava annerpaamik 24 meterinik qaffatsinneqarpat 190 km2 -inik angissuseqalissaaq.
Tasersiaq saputilerneqaruni erngata annertunerpaaffissaa assimi takutinneqarpoq. Tatsip pissusimisut annertussusia aappaluttumik titarnilerlugu takutinneqarpoq. (Ass. Alcoa / PB Power)
Ukiuni kingullerni 20-ni imeq kuuttoq pillugu paasisutissat tunngavigalugit siullermik ilisimagisamit Tasersiaq nukissamik anginerusumik aallerfigineqarsinnaasoq paasineqarpoq. Tassani ersersinneqarpoq taama avinngarusimatigisumi erngup nukinganit nukissiorfiliortoqassappat, sulluliortoqassappat sapusiortoqassappallu ingeniørit annertuumik suliassaqartut. Tasersiaq Kalaallit Nunaanni nallerneqarsinnaanngitsumik erngup nukinganik nukissiorfiliorfissaqqinnersaavoq.
Tasersiap nukimmik pilersitsisinnaassusia naatsorsuutigineqartoq: 475 - 500 MW ingerlaavartumik.
Itsarnisarsiorneq:
Tasersiaq qangarsuaq kalaallit aasami aavartarfissuaraat tatsillu sinaani nassaassarpassuaqarpoq tamaani tuttunniat inuunerannik takussutissanik. Tasersiap aamma Tarsartuup Tasersuata eqqaani itsarnisarsiornikkut misissuinerit pillugit annertunerusumik atuarit uani imaluunniit Nunatta Katersugaasiviata nittartagaani.