Inuiaqatigiit & Aningaasaqarneq
Aluminiuliorfeqalissagaluarpat tamanna inuiaqatigiinnut aningaasarsiornermullu sunniuteqartorujussuussaaq - tassalumi tamannarpiaavoq Kalaallit Nunaata pilersaarummut akulisimanerani siunertaasoq. Isumallutigut pinngortitamiittut allanngortussaanngitsut, erngup nukissiuutigineqarnera suliffinnut avammullu tunisaqarnermut aalaakkaasumut atorneqarsinnaassaaq taamaalillutillu aningaasaqarnikkut namminersulernissap anguniarneqarneranut pingaarutilimmik ilapittuutaassagaluarluni.
Tamannali pitsaanerpaamik, pitsaasunik amerlasuunik ajortunillu ikittuinnarnik nassaqarluni, pisinnaassappat pisariaqarpoq pilersaarutip piviusunngortikkiartorneranut ingerlatallu oqallisigineqarneranut atatillugu aamma inuiaqatigiinni aningaasarsiornermilu pissutsit arlalissuit misissorneqartariaqassapput. Ullumikkummi erseqqereerpoq pilersaarut arlalissuarnik iluatinnartortaqartoq. Aammalu iluatinnartut tamakkua nammineerlutik aggernavianngimmata, tamannami arlalissuarnik iliuuseqarnissanik nukimmillu atuinissamik piumasaqarmata erseqqippoq. Sallerpaatillugli pingaarnerpaajuvoq piffissaq ungasinnerusoq eqqarsaatigalugu Kalaallit Nunaata nammineq sulisinnaasuisa sullivimmi ingerlatanik tamanik tigusisinnaalernissaat aammalu sulisinnaasut sammisaqarfinni iluanaaruteqarfiunnginnerusuniittut aammalu pisortat sammisaqartitsiviiniittuut suliffimmut tassunga nutsilernissaannik piumasaqartussaavoq.
Ilinniartitsineq eqqarsaatigalugu piffissaq ungasinnerusoq eqqarsaatigalugu iliuusissat aallartinneqareerput, iluatsinnissaalu pingaaruteqarpoq, pilersaarut kisiat pinngikkaluarlugu, minnerunngitsumilli nalinginnaasumik Kalaallit Nunaanni inuiaqatigiit inuussutissarsiutitigullu nalinginnaasumik ineriartorneq eqqarsaatigalugu.
Ingerlataq taamma annertutigisoq pineqartillugu periarfissanik, ingerlatap uagutsinnut tunniussinnaasaanik, tamakkualu aarlerinaataannik sunniutissaannillu ajortutut misigisimaneqarsinnaasunik misissuinissaq pingaartuuvoq. Misissuinerit arlallit aallartinneqareerlutillu ingerlanneqareerput, pingaartumik inuiaqatigiit aningaasarsiornerat suliffissaqarnerlu eqqarsaatigalugit. Tulliuttussaq tassaavoq nunap ilaanut sunniutaasinnaasunik misissuinissaq aammalu sulisussanik amerlasuunik pissarsiniarneqartillugu, sulisussat ilaqutaasalu inuussutissarsiutinut annertusiartortunut illoqarfinnullu alliartorfiusunut nutsertinnisaaq eqqarsaatigalugut politikikkut iliuuseqarnissamut periarfissanik misissuinissaq.
Nuummi sanaartorfik ( Assi: Greenland Development)