MAPP tapersersuivoq
Maniitsumi aalisartut piniartullu peqatigiiffiata, MAPP-ip, siulersuisuni ilaasortaata, Jakob Lyberth-ip, ungasinngitsukkut Islandip kangianut paasisassarsioqataasup, upperaa aluminiuliorfiliornianeq piviusunngortinneqassappat Maniitsup eqqaani aalisarnermik piniarnermillu inuussutissarsiuteqarnermut iluaqutaajumaartoq.
“ Islandimi aluminiuliorfissuup annertussusersua takullugu tupinnaannarpoq” Jakob Lyberth oqaluttuarpoq nangilunilu: “aamma utoqqalinersiutillit peqatigiiffiannik oqaloqateqarluarpugut. Tupigusuallaatiginerpaavarali aalisakkerivissuaq takornarniagarput. Ullormut 700 tonsinik nioqqutissiorput, aali 60-niinnaneq ulloq unnuarlu sulisartunik nakkutigineqarluni. Suut tamarmik automatiskiummata sulisut nakkutiliisuinnartut sulisarput. Maaniitsuuguni immaqa 3-400-it sulisorineqassangaluarput”, MAPP-mi siulersuisuni ilaasortaq Jakob Lyberth oqaluttuarpoq.
“Paasissutissarseqaagut, kisianni uggoraara kilisaatillit peqatigiiffiata siulersuisuinik pilersaarutaangaluartutut oqaloqateqanngitsoornerput. Islandiliartinnatali MAPP-imi isummereersimavugut suliniut tapersorsorniarlutigu isumaqaratta Maniitsumi tamatsinnut ilauqutaasumik sunniuteqarumaartoq. Suut tamarmik Maniitsumi kinguariartuinnarmata inuisalu qimangarlugu, tamanna aalisarnermik inuussutissarsioqateqarnermut aamma kinguneqapiluttorujussuuvoq. Aalisakkerivik piffissap ilaannaani tunitsivigineqarsinnaa-sarpoq, matugaangallu “kalaalimineerniarfik” kisiat tunitsivittut isumalluutigilersarparput. Inuit ikiliartuinnartillugit pisisartut aamma ikiliartuinnarput. Inuussutissarsiortunut, pingaartumik angallateerarsorluni aalisartunut piniartunullu, ukiut makku assut ilungersunarput. MAPP-imi isumaqarpugut neriullutalu pissutsit ajorsingaluttuinnartut illoraap tungaanut saatinneqarsinnaasut aluminiuliorfiliortoqarneratigut. maniitsumi inuit amerleqqippata nioqqutitsinnik pisisinnaasut amerlanerulersussaammata. Aatsitsiviliorfissap umiarsualiviliornissallu sumiiffiissaat uagut inuussutissarsiutitsinnut annerusumik akornusiinavianngitsut isumaqarpugut. Imartaq taavaniittoq annikitsuinnarmik aalisarfigineqartarpoq, upernaakkut arnarluit suanniarfiulaartarluni, sulilu annikinnerusumik ukiakkut ningittakkanik qeerarniarfiusarluni. MAPP isumaqarpugut aluminiuliorfiliortoqas-sappat iluaqutissai amerlanerussasut ajoqutaasinnaasunut naleqqiullugit. Taamaattumik tapersersuivugut”, Jakob Lyberth, Maniitsumi aalisartut piniartullu peqatigiiffianni, MAPP-mi siulersuisuni ilaasortaq oqarpoq.