Teera Marianne –lu: Paasisitsiniaaneq soqutigineqarluartoq
Maniitsup katersortarfia innuttaasunik apererusussueqarluartuartunik ulikkaarluinnarsimasivoq, soqutigisaqaqatigiit pingasut - inuttaasut peqatigiiffiat, aamma alumiliuliorfissamut akuersisut akerliusullu peqatigiiffi, majimi Islandip kangianut paasisassarsiorlutik angalaqqammersut, angalanerminnit paasisitsiniaaniarlutik innuttaasunik qaaqqusimmata pingasunngornermi 8.juni, nal.19.00.
Innuttaasut peqatigiiffiat sinnerlugu Teera K Grønvoldip aamma Marianne S Møllerip Islandip kangiani inuiaqatigiinnut Alcoap sunniutigisimasai samminerullugit saqqummiussipput Fjardabyggd-ip kommunianut paasisassarsiorneq aamma Neskaipstadurip alisakkerivianut paasisassrsiorneq pingaarnerutillugit saqqummiussingamik. Akuersaartut peqatigiiffiata siulittaasuata Aqqalu Skiftip pingaarnertut saqqummiuppai Karahnjukarimi erngup nukiliorfissuanut aamma Alcoap Fjardaálimi aluminiuliorfianut paasisassarsiornermit pissarsiat, akerliusullu peqatigiiffiata siulittaasuata Bjarne 'Ababsi' Lyberth-ip erngup nukiliorfiliorluni aluminiuliorfiliorlunilu sanaartornerup nalaani, kingornalu ingerlatsinermi avatangiisinut sunniutit samminerullugit,
Saqqummiussisunut tapiliussaqarlutik Islandimut paasisassarsioqataasimasut tamarmik namminneq misigisaminnik Maniitsumilu innuttaasut sinnerlugit apeqqutigisimasamik akissutissartaannik saqqummiussuipput. Maniitsumi TV-utileqatigiit Akisuasoq, Islandimut angalanermi peqataasortaaq, assilisaminik isiginnaartitsivoq Maniitsumi innuttaasunut takusinnaaqqullugu erngup nukiliorfissuata aamma aluminiliorfiup annertussusersui.
Greenland Developmentet paasissutissiisarnermut pisortaata Juaaka Lyberth-ip saqqummiuppai suliap maannamut killiffia aamma suliassat allat suut isumannaar-neqaqqaarsimasariaqarnersut nunatsinni politikkerit Maniitsumi aluminiulior-filiortoqassanersoq aalajagiinnginneranni. Qeqqata Kommuniani borgmesterip Hermann Berthelsen-ip Maniitsumi innuttaasut qutsavigai nersualaarlugillu qasusuillutik paasisassarsiortuarnerannut ajornartorsiutaasinnaasunillu oqalliseqatigiittarnerannut, ilanngullugu kissaatiginartinnerarlugu nuna tamakkerlugu politikkerit piaartumik aalajagiinissaat aluminiuliorfissap aallartinneqarnissaanut, taamaasiornikkut Maniitsumiinnaanngitsoq, Qeqqata kommuniinnaanngitsoq, Nunatsinnili tamarmi inuussutissarsiornikkut siuarsaaneq aallartilluarsinnaaniassammat.
Unnuup ingerlanerani ataatsimiigiaqataasut aperusussuseqarluarput, apeqquterpassuit akiortorneqarlutik oqallillualaavissortoqartarmallu nalunaaqutaq 22.45 missaani aatsaat unnummik aqutsisup Lauritz Kreutzmannip paasisitsiniaaneq naammassitippaa, pilersaarutaangaluartumit 1 ½- timimik kingusinnerusukkut.
Islandimut angalaqatigiissimasut eqqarsaatigilernerarpaat Qeqqata Kommuniani inoqarfinnut allannut paasisitsiniaarusullutik, agguataarlutik ataatsimoorlutilluunniit.