Jaakutoqaq Heilmann: Paasiniaaneq pissarsinarpoq

Maniitsumi innuttaasut peqatigiiffiata siulittaasuata Jaakutoqaq Hielmannip Islandimut paasisassarsiorluni angalaneq iluarisimaarluinnarpaa, oqaatigalugulu ilimagisaminit paasisaqarfiginerusimallugu.

• Ilaana, paasisassarsiorluni angalanerput pissarsivingingaarlugu misigisimavunga, aamma angalaqatigiittugut immitsinnut qaninnerulerpugut. Paasissutissat pulaakkatsinni tamani pissarsiagut ilimagisanniit annertunerujussuupput. Islandimukartinnata piareersaraluarpugut gruppikkaarluta immitsinnut akisussaaffilerluta, kiap apeqqutit suut immikkut paasiniaaffigissanerai, tassa agguataassasoraluta. Angalanitsinnili ataatsimuuinnaratta agguataarnissaq pisariaqarsimanngilaq.

Paasissutissat suut ilinnut pingaarnerpaappat - suut pissarsiffiginerpaavigit ?

• Uanga pingaarnerutissimavakka erngup nukiliorfissuaq aamma aluminiuliorluni aatsitsivik. Taakku pissarsiffiginerpaavakka. Ilimagisannit mingutsitsinnginnerusut paasillugit aamma aarutaasartut ( isornartorsiutaasartut) tunngavissaqanngitsut paasigakkit. Toqqissiallannarpoq isumannaallisaaneq pitsaasuusoq maluginiarlugu. Paasivara sillimaniarneq mingutsitsinaveersaarnerlu assut pingaartinneqartut, ajutoortoqarsinnaanera mingutsitsisinnaanerlu pinaveersimatinneqarlutik.

Apeqqutit suut/sammisassat suut paasisassarsiornermi maqaasivigit ?

• Amigaataasunik oqaaseqassaguma, taava angalanitsinni amigaatigisutut isumaqarfigaakka napparsimaveqarneq/peqqinnissamik isumaginniffik, taavalu Alcoa Islandip kangiani suliniutinut sunut aningaasaliiffigisaqartarsimanersut. Taakku sukumiinerusumik paasisaqarfigerusukkaluarpakka.

Saqqummiussuisoqartillugu apeqqutinilluunnit akissuteqartarnerni oqaatsit atorneqartartut paasisassarsiornernut ajornartorsiutaasimappat?

• Oqaatsit atorneqartut assut uagutsinnut ajunakusoorsimassangaluarput nutserisugut kakkattut ilaasimanngikkaluarpata.

Suleriaqqinnissassinnut alloriaqqinnissaq suussava?

• Maanna innuttaasut sinnerlugit angalareerpugut, taamaammat taakkununnga paasissutissiinissaq tullinnguuppoq, taannalu pilersaarutigaarput 8 junimi pissasoq. Tassani innuttaasut aamma aningaasaliisuvut tamaasa paasissutississallugit naatsorsuutigaarput. Angalanitsinni pilersaarutaasut saniasigut naapitsisarnitsinni oqaloqateqartarnivut, kajumissutsiminnik soqutigisaqaqatigiinillu aggertut uagutsinnut qujanarsimapput Islandimi iluminni ajornartorsiutiminnik oqallisaasunillu assigiinngitsunik oqaluttuukkamisigut - ajornartorsiutit pilersimasut kingunerisaat mianersorfissat eqqartorneqartaramik.
• Maanngaanniit aallannginnitsinni naliginnaasumik isumaqartoqartarpoq aluminiummimik aatsitsivik ajornartorsiutaasoq annertooq, paasivarali killormut pissutsit ittut, tassa avatangiisini assut pingaartillugit inissisimasoq aamma sillimaniarnikkut mingutsitsisinnaanerlu mianersorfigisorujussuugaa, aamma unneqarissuusoq.

Taama oqarpoq Maniitsumi innuttaasut peqatigiiffianni siulittaasoq Jaakutoqaq Heilmann.

Innuttaasunik ataatsimiisitsinissaq pissaaq 8. juni, nal 19.00, Maniitsup Katersortarfianni.