Frantz Olsvig: Migutsitsineq annikinneruvoq

"Aatsitsiviup angissussaanut naleqqiullugu aluminiuliorfiup migutsutsinnerata annikinneruneranut pissutaasut paasillugit nuannerpoq" taama oqarpoq Maniitsumi aluminiuliorfiliorniarnermik akuersisut peqatigiiffiata siulittaasuata tullia Franz Olsvig, Islandimut paasisassarsioreernerup kingorna, isumaqarnerarporlu sulisunut atugarititaasut aamma ilinniagaqarnermut tunngasut paasisaqarfigilluarsimallugit. Franz Olsvig Maniitsormiut allat 16-nit peqatigalugit Islandiip kangianut majimi paasisassarsioqataavoq.

" Paasisassarsiorluta angalanerput ataatsimut uannit isigalugu ajorisassaanngeqaaq, naak ilaatigut immaqa eqikkagaavallaalaarnera qasoqqanarsinnaaneranut pissutaasinnaanera eqqaassanngikkaanni", Franz Olsvig oqaluttuarpoq. "Angalanissaq sioqqullugu peqatigiiffimmit takorluukkagut paasissutissat pissarsiarerusutagut annerpaartaat pissarsiarivagut, pissarsiarinngisagullu annikikkunartut eqqaassagaanni, taarsiullugu allanik takorloorsimanngisatsinnik pissarsiaqaqaagut".

Suut pissarsiffiginerpaallugit misigisivat?

• " Erngup nukissiorfittarsuata isikkua qanimut takullugu takornariarnerput, sulisunullu tunngasut paasissutissat pingaarnertut pissarsiarivagut. Alcoa-mullu tunngatillugu paasissutissat pingaarnerpaatut pissarsiattut taasinnaasakka ukuunerupput Alcoami aatsitsivissuup mingutsitsinerata angissusaanut sanilliullugu annikinneranut pissutaasut suuneri paasigatsigit aamma suliffissuarmi sulisunut atugassarititaasut pitsaassusaat ilinniagaqarnerannullu tunngasut pissarsiaqarfigilluarakkit".

Suut amingaataasutut taasinnaavigit ?

• " Amigaatitut taasinnaasatuarinnguatsiagara unaavoq innuttaasunik aatsitsiviup eqqaani najugaqartunik, aatsitsivimmullu attuumassuteqanngitsunik oqaloqateqannginnerput, ataatsimeeqateqannginnerput. Kisiannili tamanna "eqqissiviilliuutaanngitsumik" tiguarput, aamma sunaluunnit angalanitsinni anguniarneqassappat nalunnginnatsigu piffissamik aammalu aningaasanik naleqartariaqassammat. Piffissarsilluarsimasutut misigisimavunga"

Taama oqarpoq Franz Olsvig, Maniirsumi aluminiuliorfiliorniarnermut akuersisut peqatigiiffiata siulittaasuata tullia.