Bjarne Lyberth: Oqaloqatigiinnerit pissarsiffigaakka
/Bjarne_Ababsi_Lyberth.jpg)
"Nunaqqatit angalaqatigalugit qanilliallannarput"
Bjarne 'Ababsi' Lyberth Maniitsumi aluminiuliorfiliornissamut akerliusut peqatigiiffianni siulittaasoq Islandimut paasisassarsiorluni angalaneq pillugu oqaluttuarpoq. "Illuatungerisatuinnaanngitsoq ilisarisimaleratta".
Maanna angalaneq qaangiussimalermat Bjarne 'Ababsi' Lyberthip angalanermit paasisarpassuani eqqarsaatigeqqillugit oqaasertalersorsinnaalernerarpai, nammineq oqarneratut " angalanerup qaangiutereernerani eqqarsaatit oqaasinngortissinnaanngoriartoriarakkit apeqqutitit akiniarsarissavakka".
Kingumut qiviarluni isumaqarpoq paasiniaaqataasut ukiumikkut suiaassutsimikkullu agguataarneri innutaasunut naleqqunnerusimasariaqaraluartut.
Paasisassarsiorluni angalaneq ataatsimut isigalugu qanoq isumaqarfigaajuk?
Nuannisarpunga, nunaqqatit angalaqatigalugit qanilliallannarput allatut ilisarisimalerlugit, illuatungerisatuinnaanngitsoq.
Angalaqatigiit "innuttaasut sinnerlugit" angalammata eqqarsarnarpoq ukiumikkut suiaassutsikkullu agguataarneri innuttaasut 18-it sinnerlugit ukiullit nalinginnarmik agguataarsimanerinut naapertuutinnginnerat.
Aallannginnissinni takorlooriikkattut paasissutissanik naammagisannik pissarsivit?
Angalaneq aallaqqaataaniit oqaatigineqartarpoq, pissutsit pillugit "nammineq isinik takullugit" paasisassarsiornissaq, taamaammat qanimut takunngitsuukkat soorlu, Karahnjukarimi sapusiaq, Alcoap anodeliorfia, nillusaammullu saliutip takunngitsoorneri uggornarput.
Paasissutissat suut ilinnut pingaarnerpaappat - pissarsiffiunerpaarpat?
Isumaga malillugu pissarsinarnerpaapput inuit ataasiakkaat issiaqatigalugit nalinginnarmik oqaloqatigalugit paasiniaaffigineri, Alcoamut attuumassuteqartunik akerliusunilluunniit taamatut oqaloqatigineri pissarsinarnerpaapput
Suut amigaatigaagit - suut maqaasisaqarfigaagit?
Oqimaaqatigiimmik paasissutissinneqarneq suli ersarinnerusinnaagaluarpoq. Soorlu akerliusut namminneq qaaqqusisuutillugit aaqqissuussisoqarsinnaasuuppat.
Oqaatsit atorneqartut paasisitsiniaanerni/saqqummiussisarnerni ajornartorsiutaappat?
Ajunngeqaat, nutserineq aamma ajunngeqaaq
Suleriaqqinnissamut arlaannik siunnersuuteqarsinnaavit ?
Inuusunnerit peqataatillugit, sapusiarsuup alakkarnissaanut periarfissaqarneratigut angalaneq ingerlallugu.
Taama oqarpoq Maniitsumi aluminiuliorfiliorniarnermut akerliusut siulittaasuat Bjarne 'Ababsi' Lyberth.
Angalaqatigiissimasut Maniitsumi innuttaasunik tamanut ammaasumik ataatsimiisitsissapput pingasunngornermi junip 8-ni, nal. 19.00 Maniitsup katersortarfiani. Tassani saqqummiussuisoqassaaq aamma oqallittoqassalluni.