Alcoap Utoqqarmiut Kangerluarsunnguani Nukissiorfik takusarpaat

Oktobarip aappaanni Alcoap erngup nukinganik nukissiutiliornissanut pilersaarusiornermi pisortaat Greg Ott, PB Powerimeersorlu Mike McCaffrey erngup nukinga atorlugu nukissiorfik, nukissiorfimmiillu kallerup innerata Nuummut aqqutaa 56 km-itut takitigisoq paasisassarsiorfigaat.
Inuit taakku marluk, Nukissiorfiit Pisortaanit Svend Hardenbergimit, ingeniør Jørgen Raae Andersen, nukissiorfiup pilersaarusiorneranut pisortaasimasumit ingiartigineqarput.

Alcoa taamaasilluni ukiuni 15-ni nunatsinni erngup nukinga atorlugu misilittakkat paasiniaaffigisinnaasimavaat, teknikkikkullu qanoq aaqqiisimanerat takusinnaaismallugit.

(Saamerlermiit: Greg Ott, Mike McCaffrey, Jørgen Raae Andersen)

Nukissiorfimmi takornariarneq nukissiorfiup sulisuinit ingerlanneqarsimavoq, tamatumalu kingorna qulimiguulimmik taseq 12 m missaanik sapusersorneqarsimasoq takusarneqarsimalluni. Utimut Nuup tungaanut timmineq kallerup innerata aqqutaa malillugu ingerlasimavoq, taamaasiornikkummi aqqutit ajornartortaasa qanoq aaqqiiffigineqarsimaneri takusinnaaniassammassuk, soorlu Amerallip kangerlua 5 km isorartutigisoq ikaarniarlugu kallerup innerata aqqutaa silaannakkut siaartitsivigineqarsimanera.

Takuniaanermi paasisat aluminiuliorfissamut erngup nukinga atorlugu nukimmik annertunerujussuarmik pilersuiniarnermi pilersaarusiornermut atorneqarumaarput.