Naleqqussarneq pisariaqarpoq
Olga Berthelsen Ljungdahl, Qeqqata Kommuniani IA sinnerlugu kommunalbestyrelsimut ilaasortaasoq isumaqarpoq, suliffeqarfiit inuinnaallu tamarmik siunissami piumasaqaatissanut nalequssalereertariaqartut.
”Periusitoqqat ileqqutoqqat qaangertariaqarpavut, siunissami inuussutissarsiutitigut periarfissat annerpaamik pissarsiffigissagutsigit”
Olga B Ljungdahl oqaluttuarpoq. Taanna Qeqqata Kommuniani inuussutissarsiortut sinniisaat peqatigalugit Islandimut oktoberimi paasisassarsiortunut ilaavoq. Misigisani imatut oqaluttuarai:
”Islandimut peqataanissamut periarfissaqalerama iluatigilluinnarlugu tiguara, isumaqarama suliffissuup qanimut paasiniaaffiginissaanut periarfissaalluartoq. Paasisitsiniaanernut peqataasaraluarlunga suliniutit imminnut ataqatigiinneri takolooruminaatsittarsimagakkit. Suliffeqarfissuaq qanoq suleriaaseqarnersoq, taavalu illersuisut akerliusullu tunngavilersuutigisartagaat isummersorfigisariaqarakkit. Nammineq paaserusunnerusimavakka avatangiisinut tunnganerusut, paasisakka tunngavigalugit kommunitta iluani qanoq suleriaqqinnissarput nalilersorusullugu.
Islandimi angalanissinni paasissutissat suut maluginiarusimavigit?
”Periutsit nutaat atorlugit avatangiisinut mingutsitinnaveersaartoqarsinnaasoq, saniatigullu teknikkikkut periarfissat nutaat kisiisa isumalluutiginagit aammali Alcoap nammineq avatangiisiminut suliniuteqartuarnera, suliffissuup iluani silataanilu. Suliffeqarfiup namminerminut sulisuminullu piumasaqaatai. Suliffeqarfik sulisullu peqatigiillutik avatangiisiminik mingutsitsinaveersaarnerat, pinngortitaannaq eqqarsaatiginagu aammali suliffeqarfiup iluani sillimaniarnermut piumasaqaatit qaffasissut sakkortuullu aqqutigalugit
Arlaannik neriuutigisaqarpit?
Takusakka tusakkallu aallaavigalugit isumalluarpunga Nunatsinni suliffeqarfiit, suliffissallu nutaat pilersinneqartussaammata, Alcoa Maniitsumi aallartissagaluarpat. Suliffissammi nutaat pilersinneqartussaapput. Taammatullu suliffeqarfissat nutaat sulisussaallu suliassanut nutaanut tulluussartuartarnissaat, suliffeqarfimmi sulisoqarnermut piumasaqaatinut avatangiisinullu mianerinninnissamut piumasaqaataajumaartussanik, suliffissuaq sorlerluunniit pilersinneqassangaluarpat.
Suut mianersorfissaappat?
Oqarsinnaasoraanga mianersorfissat pisortat pilersaarusiorneranni ingerlatinerannilu annertuujusut. Ilaatigut sanaartornikkut aamma inatsisitigut, Suliffissuarujussuarnut immaqa naggaterpiaatigut piviusunngorsinnaanngitsunut inuiaqatigiit neriulussinnaveersaartittariaqarput.
Islandiliarnersi ataatsimut isigalugu qanoq pissarsiffigaajuk
” Pissarsiffigeqarput - suliffeqarfiit qanoq kattuttarnerat suliassanik nutaanik annerusunillu naammassinniarnerminni. Sulisuulerumaartussat suliffissaminnit piumasaqaatinut nutaanut tulluussartuartarnissaat. Periusitoqqat ileqqutoqqat qaangerniarnissaannut piffissaq sivisusinnaasoq nalunngilarput. Taamaattumik aluminiumik aatsisiviliornissaq piinnarnagu, suliffeqarfissuassalli allat nutaat pilersinniarneqartut ataatsimut eqqarsaatigalugit, tamatta suliassaqarpugut inuttut suliffeqarfittullu piffissanut nutaanut naleqqussarnissamut. Eqqarsaatigaakkattaaq sulisussanik pikkorissaasarnerni ukiorpassuarni periusaasartut. Isumaqartoqartuarsimavoq suliffissaaleqisoq kisimi naleqqussartassasoq, apeqqutaatinnagu suliasaq sorlerluunniit neqeroorutaanersoq. Isumaqarpungali suliffeqarfiit aamma suliassaminnut nutaanut naleqqussartariaqartut. Kiisalu pisariaqarpoq suliassaq suungaluartorluunniit naammassiniarlugu suleqatigiittoqarnissaa.
Tusakkavut takusavullu pissarsiffigeqaavut, soqutiginassangaluarporli nunamik allamik aamma aluminiuliorfiusumik naleqqiuffissaqaraluarutta.
Isumaqarpunga innuttaasut tikilluinnarlugit paasisitsiniaaneq pisariaqartoq. Innuttaasut tikillugit oqarama isumaqanngilanga paasisitsiniaaneq maanna ingerlasoq unitsinneqassasoq, isumaqarpungali agguataarlugu immikkoortitaartuugaluaraanni pissarsiffigiuminarnerussangaluartoq”. Olga B. Ljungdahl oqarpoq.