Kinamiut aluminiuliorfiannik Naalakkersuisunut ilaasortaq Ove Karl Berthelsen takuniaavoq
Naalakkersuisunut ilaasortap Ove Karl Berthelsenip novemberip 9-anni Huang He Xin Ye takuniarpaa, Kinami aluminiuliorfiit nutaajunerpaat ilaat.
Kinap kitaani nunap immikkoortuani Qinghai-mi erngup nukiliorfissarujussuit iluaqutigalugit nunap ineriartortinneqarnissaa assut soqutigineqarsimavoq. China Power Investment (CPI) Kinami innaallagissiorfiit annersaat 6,5 milliarder koruuninik aningaasaliisimavoq aluminiuliorfimmik nutaaliamik ukiumut 555.000 tonsinik pilersitsisinnaasumik sanasoqarnissaanut. Suliffissuaq taanna Kinamiut teknologiannik nutaanerpaanik marlunnik atuiffiusuuvoq. Takuniaanermut peqquterpiaavoq kiniseret teknologiiat nutaaliaasoq atorlugu suliffissuaqarneq paasiniaaffigissallugu, tassami teknologi taanna Maniitsup eqqaani aluminiuliorfiliortoqassappat atorneqartussatut naatsorsuussaammat.
Aluminiuliorfimmi nioqqutissiorfiit marluupput, siulleq 2008-mi sanallugu aallartinneqartoq, 2010-milu atulersoq, aappaa 2009-mi aallartinneqartoq, 2011-milu atulersoq.
Over Karl Berthelsen-ip takuniaanerani angallassisuupput CPI-ip pisortaata tullia Lianchen Wu, suliffissuup aluminiuliortarneranut akisussaasoq aamma aatsitsiviup pisortaa. Suliffiissuup nioqqutissiorfittaava takusarneqarpoq, sulisunik oqaloqateqarnissamut periarfissaqarluni, aatsitsivissuit takutinneqarlutik, inilu nakkutilliiffiusoq takuniarneqarluni. Aluminiuliorfik suli aallartisarneqarfimminiippoq nioqqutissiorsinnaassusia suli tamakkiisumik naammatsivinneqarani. Nioqqutissiornermilu atortorissaarutit Islandimi Europami Amerikallu avannaani atortorissaarutit assigaat
Teknologi tunngaviusumik atorneqartoq Kinaminngaanneersuugaluartoq kitaamiut suliffiutaat amerlasuut sanaartornermi aamma nakkutilliissutinik atortulersuinernut peqataatinneqarsimapput. Tassaapput Europamiut Amerikarmiullu suliffiutaat, suliffissuassap atortulersornissaanut pilersuisuusimasut, kiisalu suliffissuup tamarmiusup sananeqarnerani misissueqqissaartuusimasut. Suliffissuaq teknikkikkullu atortut pisortat piumasaqaataat malilligit ingerlanneqarput, nassuiaassutigineqarporlu assersuutigalugu flourimik aniatitsineq pisortat killiliussaat ataallugu ingerlanneqartoq. Siusinnerusukkut Aluminiuliorluni suliffissuaqarnermut flour tassaasimavoq avatangiisinut sunniuteqarnerpaasarsimasoq. Nunap immikkoortuani tassani avatangiisinut oqartuussaasut qanimut suleqatigineqarsimapput, ukiunilu kingullerni Kina-mi oqartussat suliffissuup avatangiisinik mianerinnittuunissaa aamma inuiaqatigiinnut qanigisaaniittunut sunniutissai pingaartillugit sammisarsimavaat.
Innaallagiaq pisariaqartitani annerpaat erngup nukiliorfimmit kuussuarmit sungaartumik atilimmit aatsitsiviup pisarpaa, taanna aatsitsivimmiit 100 km-inik ungasitsigisumiippoq.
Aatsitsiviliorfik nittartagaqarpoq kiniserisuinnaq oqaasertalimmik uani www.hhxy.com.cn