Kina-mi nunatsinnilu aluminiuliorfiliorniarnermut tunngaviit assigiipput

Naak Kina Nunarpullu imminnut ungasikkaluaqisut inuiaqatigiillu assigiinngissuteqaqalutik, nunatsinni aluminiuliorfiliorniarnermut tunngavilersuutit  assigiissuteqartorujussuupput. Novemberip qaammataani 2011  Ove Karl Berthelsen-ip paasisassarsiorfigaa China Power Investments-ip  Xinye—mi aluminiuliorfiutaa nutaaq, Kinap kitaani nunap immikkoortuani Qinghai-miittoq, naasorissaasoqarnermik pingaarnerusutut inuussutissarsiuteqarfiusimasoq

Kina-mi ileqquusimangaluarpoq aluminiuliorfeqarneq Kinap kangiani inuppassuaqarfiusumiitsinneqartarluni.  Kina-mi naalakkersuisut kissaatigiartuinnarsimavaat innaallagissamik amikkisaaleriartorneq ilutigalugu nunap immikkoortortaasa allaniittut  ineriartortinnissaat aamma nukissiorfiliorfigineqarsinnaasut ineriartortinneqarnissaat. Taamaasilluni aluminiuliorfiliortitsiniarneq nunap tamakkerluni aamma nunap immikkoortortaani inuussutissarsiutinik ineriartortitsinissamik pilersaarutip ilagisimavaa.  Aningaasaliissutit 6,5 milliarder koruuniusut ilaat 10 %-tiusut nunap immikkoortuani tassani naalakkersuisut aningaasaliissutigisimavaat.

Paasisassarsiornermi nassuiaassutigineqarpoq aatsitsivissuup tamaannga inissinneqarneranut peqqutigisat annerpaartarisimagaat akimigut unammillersinnaalluartumik nukissiorfiliortoqarsinnaanera. Nunap immikkoortuani Qinghai-mi nukissiuutissanut sillimmaterpassuaqarpoq, ilaatigut erngup nukiliornikkut, tamaani najugaqartut atorsinnaasaat sipporujussuarlugit. Innaallagiaq Kinap kangianut ingerlateqqiinnarnagu kissaatigineqarsimavoq suliffissanut pilersitsinissanut atorneqarnissaa. Nunap immikkoortortaa tamanna naasorissaasoqarfiuvoq kinguarsimasoq, Kinap kangianisulli siuariartornerujussuarmik aqqusaarneqarsimanngitsoq. Aluminiuliorfik ullumikkut 3000-it tungaannut suliffigineqarpoq, inuillu tamaanimiut 10.000-it aluminiuliorfeqarneq inuussutissarsiornerminnut toqqammavigaat

Kinap kitaani Xinye-ip aluminiliorfiata tunngavigisai Maniitsup eqqaani aluminiuliorfeqalerniarnermut assigusorujussuupput. Aningaasaliisussaniit isigalugu pingaarnerpaavoq nukissiorfimmut akimigut allanut unammillersinnaasumut periarfissaqarnera, inuiaqatigiinnillu isigalugu innuttaasut inuussutissarsiutissanik nutaanik ataavartussanillu periarfissaqalernissaannik kissaateqarneq.