GD-mi ilinniartutut ikiorti ilisimatusarnermik ingerlataqalissaaq
GD-ip Københavnimi allaffiani ukiuni marlunni ilinniartutut ikiortitut sulereerluni Aviaja Lyberth Hauptmann taamaatittussanngorput. Aviajap suliasarsimavai nittartakkamut allagaqartarneq aamma aluminiumik suliffissuaqarneq pillugu paasissutissat sukumiisut nutartertuartarneri.
GD qimakkunikujuk Aviajap piffissani tamaat atorlugu Københavnip Universititiani paasiniaaqqissaarluni ilisimatusarneq ingerlatissavaa biologimik soraarummeerutissaminut allagaqarluni.
Ilinniarnini naammassiguniuk neriuutigaa Kalaallit Nunaanni suliffissuaqarnerup ineriartortinneqarneranut tunngasunik suliaqalernissi, taamanikkornissaanulli suliffissuaqarneq allanut sammisoq Aviajap sammissavaa, tassalu bioteknologi.
Aviajap ilisimatusarfigisai tassa bakteriat aamma enzymit nunatsinneersut, soorlu Sermitsiaq 44/2011-mi atuarneqarsinnaasutut paasiniakkaminik ingerlatitsillaqqissutsiminut Academicus Arcticus-imik nersornaatit aappaannik nersornaaserneqarami. Ilisimatusakkani Ikait napasui, taakku uumasuaraarai enzymiilu pillugit allaaserisaminut nersornaatisissutigai.
Ungasinngitsukkuttaaq Aviaja ilisimatusarnissaminut Oticonip aningaasaa-teqarfianik 100.000 kr-inik tunineqarpoq. Oticonip Aningaasaateqarfiata ilinniartut immikkut piukkunnaateqartut aningaasanik tunisarpai, ilinniakkaminnik naammassinninniarlutik suliaqarnerminni piffissartik tamaat ilinniakkaminnut atorsinnaaqqullugu. Aningaasaliineruttaaq siunertariasarpaa ilinniagaqartup suleqatissaminut attaveqalersinnnaanissaa. Aviajap ilisimatusarnermi ilaa Kalaallit Nunaanni Pinngortitaleriffimmi ingerlanniarpaa.
”Aviajap qimattussanngormatigut aappaatigut sakimmeringaluaqaarput, aappatigulli qimagunnissaminut peqqutigisai nuannaarutigisorujussuullutigit, pisortaq Flemming Drechsel oqarpoq. ”Aviajap nersorneqarnera uanga nammineq tupaallaatiginnilluinnarpara, uangami suleqatittalu Aviaja suliffimminut tunniusimalluartutut peqqissaartutullu misigisaqarfigijuaannarparput.
Suliffimminut tunniusimanermigut ilisimasaqassutsimigullu Aviaja ukiuni aggersuni alloriartussanngorput ilisimatuutut qaffakkiartornissaminut. Tassunga tunngatillugu tunniukkumaagassai naleqartorujussuussapput, apeqqutaatinnagu inaarsaataasumik allakkamini uppernarsassaneraa Ikka-napasut uumassuaraqassutsimikkut aningaasarsiorfiulersinnaaneri, imaluunniit allagaqaatissaa tassaassanersoq Kalaallit Nunaanni uumassuseqartut pillugit ilisimatuussutsikkut ilisimalikkat amerlanerulernissaat”
Aviaja Lyberth Haupmann, GD-mi suliffimmik misiliisartut ilinniartutullu ikiortit allat assigalugit, assersuutaalluarpoq ilinniartutut ikiortaaneq ilinniakkamillu ingerlatsineq ingerlakkaanni periarfissanik makkunannga ammaasinnaasoq: 1) ilinniagaqarneq tunulliutilinngikkaluarlugu suliffimmik ingerlataqarnermik misilittagaqarluarnissaq;2) ilinniagaqarnermi tapertassanik aningaasanik pissarsisinnaaneq; 3) suliassanik pingaaruteqartunik suliffimut iluaqutaasunik ersarissunik suliaqarsinnaaneq.
Taamaattumik GD-mut nuannersuuvoq Aviajap ilinniartutut ikiortitut soraarnissaata nalunaarutigineqarnera ilutigalugu nalunaarutigisinnaagatsigu ilinniartut ikiortissat allat marluk sulilersussat, tassa ilinniartitsisunngorniaq Ellen Jakobsen aamma tusagassiortunngorniaq Sorlannguaq Petersen. Taakku Nuummi allaffeqarfimmi sulisassapput.