Alcoa Kalaallit Nunaanni

Alcoa aamma Maniitsumi aluminiuliorfiliorniarneq pillugu tusagassiortunngorniat allaaserisaqalerput qulequtalimmik “Alcoa Kalaallit Nunaanni”

Itisiliilluni tusagassioriaatsimik ilinniarnerminnut atatillugu tusagassiortunngorniat sisamat Ilisimatusarfimmi Tusagassiornermut immikkortortami semisterit arfernanni atuartut Alcoa aluminiuliorfiliorniarnerlu pillugit allaaserisaqarnissaminnik suliakkerneqarsimapput qulequtaqartumik “Alcoa Kalaallit Nunaanni – Alcoa i Grønland”. Taama oqaluttuarpoq tusagassiornermik ilinniartitsisoq Thora H. Nielsen, ilinniartut ilaat pingasut ilagalugit tallimanngornermi 7 februar aluminiuliorfik paasiniaaffigiartussallugu.

Islandiliarluni aallalersoq.

Inatsisartut upernaakkut ukiakkullu 2012-mi ataatsimiinissaminni aalajagiiffigisussaavaat sinaakkutaasumik piumasaqaatissat Alcoap Maniitsup eqqaani aluminiuliorfiliornissamut pilersaarutaanut. Aluminiuliorfik, innaallagissamik anertuumik pisariaqartitsisartoq, suliniutit annertoorsuit ilagaat, erngup nukinga iluaqutigalugu ingerlanneqartussaq. Erngup nukiliorfissat ilanngullugit sanaartornissaq tamarmi 20 milliarder kroninik akeqassangatinneqarpoq. Taakkununnga ilaanngutissapput Maniitsumi ataqatigiissutsinik inissialiornissanillu sanaartornissat 2,3 milliarder kroninik missigersorneqarsimasut. Taamaasilluni suliaq taanna Kalaallit Nunaanni sanaartugassat annerpaarpaartarilersussaavaat – Nunatsinniit sinaakkutissatut piumasaqaatit ima unammillersinnaasuseqartigippata Alcoap aningaasaliissutigiumaagai imminut akilersinnaassallutik. Tamannarpiarlu peqqutigalugu ilinniartitsisup Thora H Nielsen-ip qulequtaq tamannarpiaq sammisassatut toqqarsimavaa:

• “Tusagassiortunngorniat sisamaasut ilaasa pingasut Alcoap pilersaarutai sammisareernikuuvaat, siorna radiukkut aallakaatitassioriartorlutik Maniitsumiikkamik. Ilinniartut taamani samivaat innuttaasut isumaat, pinngortitaq, piniagassat, suliffissat, SIK aamma Maniitsup periarfissai. Aallakaatitassiat tamarmik KNR-ikkut tusartinneqarput”, Thora H Nielsen oqaluttuarpoq.
• “Alcoap pilersaarutaanik sammisaqarnermi tusagassiortunngorniartunut pingaaruteqarpoq paasisaqarfigissallugu aatsitsivik qanoq ingerlanneqarnersq aamma taassuma inuiaqatigiinnguanut, pinngortitamut avatangiisinullu sunniutai. Siornali Islandimukarniaraluarpugut, kisianni innermik anitsisoqarnerata kingorna uniinnarallarluta. Taamaattumik assut nuannaarutigaarput maanna Alcoap aatsitsivia Fjardarbyggdinimiittoq aamma erngup nukiliorfissua Kárahnjúkarimiittoq takuniarsinnaaleratsigit, inuillu Islandip kangiamiut Reykjavikkimiittullu oqaloqatigissallutigit”, Thora H Nielsen oqaluttuarpoq.

Pilersaarutaasutut tusagassiortunngorniat tamarmik suliakkerneqarput marlunnik nutaarsiassatut ittunik Islandimiinnermiinit allaaserisaqassasut. Allaaserisat tamarmik saqqummiunneqarsinnaasariaqarput, ilusilersueriaatsimut InDesignimut, nunatsinni tusagassiorfiit atorusuttagaannut, allassimasussaallutik.

Sapaatit akunnerini marlungajanni piareersarfiusuni tusagassiortunngorniat teoriimik atuarsimapput aamma Maniitsup eqqaani aluminiuliorfiliorniarneq pillugu nalunaarusiat nassuiaatillu atuaqqissaarsimallugit kiisalu Alcoamut tunngasunik paasisassarsiorsimallutik. Tamakku saniasigut Greenland Developmentip pisortaa Flemming Drechsel, ilinniartunut oqalugiartinneqarsimavoq.

Itisiliilluni tusagasseeriaaseq tassaavoq tusagassiortunngorniat qaqilerillutik tusagassiorsinnaanermut pisinnaasassaannik ilinniartinneqartarfiat. Tusagassiortunngorniat sapaatip akunnera Islandimiinniarput, Thora H Nielsen-lu naatsorsuutigaa allaaserisat “Alcoa Kalaallit Nunanni – Alcoa i Grønland” ullut 14-nit qaangiunneranni naammassereersimassasut qulequtap sammineqartup ilinniartitsisutigineqarnera naammassippat.

Soqutiginnittunut paasissutissiissutigineqarsinnaavoq Flemming Drechselip aluminiuliorfiliorniarneq pillugu tusagassiortunngornianut oqalugiaata aaneqarsinnaammat www.aluminium.gl–imi, soorlulittaaq oqalugiaatit saqqummiissallu allat Greenland Developmentip suliarisarsimasai tamarmik nittartakkami tassani PDF -itut uani aaneqarsinnaasut http://www.aluminium.gl/suliniut/oqalugiaatit/2012-mi-saqqummiussat