Islandimit misilittakkat
Islandimit ilisimalikkat aamma Islandip misilittagai maanna paasijuminarsarlugit allaaserineqarlutik www.aluminium.gl – mi atuarneqarsinnaalerput. Aluminiuliorfiliorsinnaanermik suliniutip suliarinerani pingaaruteqarpoq misilittakkat ilisimasallu tunaartarineqarsinnaaneri. Aluminiuliorfinnik suliffissuaqarneq Islandip 1960-ikkulli aallartilaarnerannit misilittagaqarfigilerpaa, ullumikkullu aluminiuliorfiit sisamassaat sananiarneqalerpoq.
Avatangiisip pinngortitallu aalajangersaaffigineqartarnerat Islandip misilittagaqarfigilluarpaat, nunanillu allamiunik suliffissuaateqarfiunerup inuiaqatigiinnut pingaarutaa paasisimaqqissaarlugu. Kiisalu Alcoa’p Fjardaálimi Islandip kangianiittumi aluminiuliorfia ilisimasassanik pingaarutilinnik pilersitseqataasarsimavoq. Aatsitsivik sananeqarsimavoq Islandip ilaani illoqarfeerannguit inoqarpallaanngitsut, aalisarnermik pingaarnertut inuussutissarsiuteqarfiusimasut, sanileralugit. Suliassarujussuaq pivijusunngortinniarlugu sanaartornerujussuup nalaani inuiaqatigiinnguit taakku qanoq iliuuseqarsimappat? Suliffissuarujussuarlu nutaarluinnaq nioqqutissiulerami inuiaqatigiinnguanut qanoq sunniuteqarsimava? Sunniutaasimasut pitsaasuuppata ajortuuppataluunniit, tassaapput misilittakkat Nunatsinni aluminiuliorfiliorniarnermut pingaaruteqartut.
Tamakkorpiaat peqqutaallutik Kalaallit Nunaanni Namminersorlutik Oqartussat aamma Greenland Development piffissap ingerlanerani paasissutissarpassuarnit Islandimeersunik pissarsiniartarsimapput, soorlulittaaq nunatserneersut amerlaqisut Islandip kangianut namminneerlutik paasisassarsiortarsimasut, aatsitsivik takuniarlugu, innuttaasunik, pisortanik, suliffeqarfinnik soqutigisaqaqatigiinnillu oqaloqateqartarsimallutik. Aluminiuliorfimmik nammineerlunik takunninneq inunnillu aatsitsivimmut attuumassuteqartunik oqaloqateqarneq nunatsinni suliniummik paasisaqarnerunissamut periarfissatsialaavoq. Minnerunngitsumillu, suliniutip ingerlanneqarnerani qularnaarneqartoq tassaavoq taamaassagatitsinerit pinnagit ilisimasanilli misilittakkanillu piviusunik tunngaveqarluni suliniutip paasissutissiissutigineqartarnissaa.
Ukiut ingerlaneranni nalunaarusiat misissueqqissaarnerillu saqqummiussorneqartartut Islandimi misilittakkanittaaq ilaqartarsimapput. Nalunaarusiat tamakku tamarmik Greenland Developmentip nittartagaani pissarsiarineqarsinnaapput. Taamatuttaaq Islandimit misilittanik suli amerlanerusunik pissarsiortoqartarsimavoq, Maniitsup eqqaani aluminiuliorfiliorniarnermut paasissutissiissarnermut soqutiginaateqarluartunik.
Taamaattumik allaaserisanik nutaanik www.aluminium.gl –mut ikkussivugut Islandimi, pingaartumik kangiani, aluminiuliorluni sulffissuaqarnermit misilittakkanik oqaluttuarinnittunik, sapinngisamik paasiuminartumik allaaserisaasunik. Allaaserisat tassaapput sanaartornerup ingerlatsinerullu nalaani sulisartoqarnernut tunngasut, inuiaqatigiinnut sunniutaasimasut assigiinngitsut, paasissutissallu allat nunatsinni aluminiuliorfiliorniarluni suliniummut attuumassutillit soqutiginaateqarsinnaasullu.
Atuarluarisi