Suliniutip oqaluttuassartaa
Suliniut 2006-miilli arlalippassuartigut ineriartorpoq. Suliniutip ineriartortinneqarnera teknikkikkut misissueqqissaarnermiissimavoq aamma suliniutip pilersaarusiornerani, tamanna immini suliaavoq annertooq. Suliniutit taama annertutigisut ukiuni 10-20-ni ineriartortinneqakkajupput inerivinnissamik tungaanut, tassa teknikkikkut misissugassat amerlasuujusarmata aamma suliniummut tunngavissanik isumaqatigiinniartoqaqqaartarmat. Assersuutaalluarsinnaasoq tassa Alcoap Fjardaálimi Islandio kangiani aluminiumik aatsitsivia 2007-mi atulersoq. 1970-ikkut naalernerannili taavanimiut suliniutigilerpaat erngup nukiliorfiusinnaasut iluaqutigalugit suliffissanik nutaanik pilersitsisoqarnissaa, aatsaalli ukiorpassuit qaangiunneranni aatsitsivissaq naammassineqarpoq. Suliniutit allaniittut sukkanerusumik piviusunngortinneqarsinnaasarput, apeqqutaasarporli piumasaqaatit pissutsillu qanoq ittuuneri. Islandimit misilittakkat sukumiinerusumik uani paasisaqarfiginerusinnaavatit.
Ilutigalugu politikkikkut suliat ingerlanneqarsimapput, suliniutip inueqatigiinnut sunniutissai periarfissaqartitsilerfissaalu oqallisigineqartarlutik. Bibliotikkimmi nassaarisinnaavatit nalunaarusiat aalajangernissanullu tunngaviusarsimasut Naalakkersuisut Inatsisartunut saqqummiuttarsimasaat 2007-miilli.
Suliniutip annertunerujussua peqqutigalugu 2006-ip naalernerani Greenland Development A/S, 100 %-imik Naalakkersuisunit pigineqartoq, sullissisussatut pilersinneqarpoq,, suliassaalu ataasiinnaalluni tassa suliniutip ineriartortinneqarnera suliarissallugu, Naalakkersuisut naleqqiussaat aallaavigalugit. Taamaasilluni Greenland Development allanik suliaqarsimanngilaq, taamaallaat piginnitsimik – Naalakkersuisut – suliakkiissutaannik. Suliffeqarfiup ukiut ingerlaneranni nalilersuinerit misissueqqissaarnerillu suliarisimavai, bibliotikkimi pissarsiarisinnaasatit. Tamakku politikkikkut isummersornernut atorneqartarput, minnerunngitsumillu suliniummut ilisimasaqarnerput annertusitippaat.
Greenland Developmentsip, allaffissornikkut sullississutut ukiumoortumik nalunaarusiai 2006-2012 ataani pissarsiarisinnaavatit