Nunatsinni nukissiorfissaqqissut
Nukissiornissamut sialuk apulluunniit qaqqanut imaluunniit sermersuarmut nakkaasoq periarfissanik pilersitsisarpoq. Nakkaasut annertusiartortillugit aamma nakkaaffiat katersuuffiallu qutsineruleriartortillugit, nukiit annertunerusut katersuunnerat annertusiartortarpoq.
Erngup nukinganit nukissiorfik imeq sukkasuumik kuuttoq turbine-kkoortillugu nukinnik tigooraaffigisarpaa. Turbine-llu nukiit tigooqqakkani sarfanngortittarpai, sarfarlu nuna isorartooq aqqutigalugu ingerlateqqinneqartarpoq sumiiffinnut sarfamik atuiffiusunut. Sarfaq pilersinneqartoq annikillisinneqarsinnaavoq imaluunniit annertusineqarsinnaavoq imeq turbine-kkut kuuttoq annikillisinneratigut imaluunniit annertusineratigut.
Kalaallit Nunaanni amerlasuunnik erngup nukinganit nukissiorfiliornissamut periarfissaqarpoq. Ingammik nunatta kitaata Kujataanni arlalinnik annertuunnik periarfissaqarpoq, innuttaasut sarfaq pilersinneqartoq tamakkerlugu atorsinnaanngisaannik.
1975-imiilli Kalaallit Nunaanni Teknik-ikkut Aaqqissuussisoqarfik, GTO, aamma Kalaallit Nunaanni Ujarassiornermut Aaqqissuussisoqarfik ataqatigiissaartumik aaqqissuussamik sumi Nunatsinni erngup nukinga atorlugu nukissiorfiliortoqarsinnaanersoq nalunaarsorsimavaat.
Aallaqqaataaniilli GTO-p ujartorsimavai illoqarfiit qanittuaniinaanngittoq kisiannili aamma sumi erngup nukinga atorlugu nukissiorfiit anginerpaat inissisimanissaat periarfissaanersoq. Takorloorneqarsimavormi sarfaq pilersinneqartup annerpaartaa aatsitassarsiornerup iluani atorneqarumaartoq.
Suliffeqarfiit sarfamik annertuumik atuisussat pillugit erngup nukinganit nukissiorfiliussagaanni annertuumik misissueqqaarnermut sanaartornissamullu aningaasartuuteqartoqassaaq. Taamaattumik GTO-p pisortanit 1970-sikkut naalernerani suliffeqarfiit angisuut eqqarsaatigalugit misissuititsisarnerat annikilliartortinneqarpoq. GTO-li illoqarfiit qanittuini periarfissat nalunaarsorlugit aallunnerulerpai, nukissiorfiit pilersuinissamut pisussaaffillit akilersinnaanerusumik sarfamik tunisisinnaaniassammata.
Namminersorlutik Oqartussat nukissiornermut suliffeqarfiutaa, Nukissiorfiit, GTO-p illoqarfinnut nunaqarfinnullu nukissiorneq pisussaaffigalugu pingaartitaa ingerlateqqippaa, 1993-imilu Kalaallit Nunaanni erngup nukinganit nukissiorfik siulleq Nuummut sarfamik kiassarnissamullu atugassamik pilersuilerluni. Uani Kalaallit Nunaanni erngup nukinganit nukissiorfiit paasisaqarfiginerusinnaavatit.
Aatsitassarsiornissamut misissuisoqartillugu erngup nukinganit nukissiorfiit isumaliutigineqartarput, taamaattorli pisortat imaluunniit suliffeqarfiit Kalaallit Nunaanni erngup nukinganit nukissiornissamut periarfissat pillugit, nunani allani suliffeqarfinnut sarfamik annertuumik atuisartunut, pilerisaarisoqanngilaq.
Asiaq - Misissueqqissaartartut, sumiiffinni aalajangersimasuni ataavartumik erngup pissusaanik uuttortaasarput, taamaasilluni siunissami arlalinnik erngup nukinga atorlugu nukissiornissamut periarfissat pillugit ilisimasat amerliartortillugit.