Aluminiu Islandillu aningaasaqarnera

Islandip aningaasaqarnera ammasuuvoq mikisunngullunilu, nioqqutissiutit namminersortunit pigineqarput. Aningaasaqarnerata – nunatsinnisulli – ilisarnaatigaa nunanit allaniit eqqussukkat annertoorujussuummata, kisiannili aamma Island nammineq atugassaminik annertuneroqisumik nioqqutissiortarpoq amerlaneroqisunillu nunanut allanut nioqquteqartarluni. Assersuutigalugu Islandi inuussutissanik sullissinertigullu arlalissuartigut imminut pilersortuuvoq. Nunap aningaasaqarnerata qanoq ingerlaneranik uuttuut, nunap tamarmi ukiumut nioqqutissiaasa nalingisa katinnerisigut nanineqartartoq, qallunaatut bruttonationalproduktimik taasagaat BNP-millu naalisarneqartartoq, 2010-imi Islandimi 66-70 mia. Dkr. annertussuseqarpoq (danskit aningaasanngorlugit, aningaasat naligisa nikerarnerat naapertorlugu naligi allanngortarput), 2008-mi nunarsuatsinni aningaasarsiornikkut ajalusoornersuarmi Island eqqorneqarnerpaanut ilaammat appariaatit 15-20 % uani ilaapput.

Aluminiuliorluni suliffissuaqarneq Islandip aningaasaqarniarneranut pingaaruteqaleraluttuinnarpoq – pingaartumik aningaasarsiornikkut Islandip atugarliornerata nalaani, aluminiumik avammut nioqqutissiorneq suliffissaqartitsisimavoq aalajaatsumik nunanillu allamiut aningaasaannik eqqussueqataasuusimalluni.

Aluminiuliorluni suliffissuaqarnerup Alcoa-llu Fjardaálimi aatsitsiveqarnerata Islandip aningaasaqarniarneranut sunniutai immikkoortuni tullerni atuakkit.