Aluminiu siunissarlu

Aluminiumik atuineq qanoq isikkoqarpa – ullumikkut siunissamilu

Allaaserisami atuarsinnaavat kikkut aluminiumik atuisuunersut,  siunissamilu atuisarnerup ineriartornissaa qanoq takorloorneqarnersoq.

Sanaartortut assartuisartullu atuinerpaapput

Ullumikkut aluminiumik atuinerpaasut tassaapput saanaartortitsiviit aamma angallannermik ingerlataqartut. Nunarsuarmi atuineq tamakkiisumik isigigaanni taakku affaasa missaaniipput. Atuinerup sinnera poortuisarfinni, maskiinani, atortuni innaallagissanoortuni assigisaannilu ipput.

Aluminiumik atuineq kanngussamut sanilliullugu assigiingitsorpassuarnik sammiveqarpoq tamannalu patsiseqarpoq aluminiup ingerlatsivinni amerlasuuni atorneqarneranut. (tak. ass. 1)

Ass. 1: Diagrammi aluminiumik kanngussamillu atuisut immikkoortitaarneri.

Aallerfik: CRU Strategies

Aluminiumik suliffissuaqarfiit ullumikkut ineriartorneri

Aluminiumik suliffissuaqarfiit ineriartorneri ukiuni kingullerni qulini aallaaveqarsimavoq tunisassiornerit Asiami Kinamilu qaffakkiartorsimanerannit. Ukiut kingulliit qulit ingerlaneranni Kinami aluminiumik atuisarneq sisamariaammik annertusisimavoq. Tamanna patsiseqarpoq Kinami nunap atortulersorneqarneranik aningaasaliisimaneq aamma inuuniarnerup oqilisagaanerata kingunerisaanik inuup ataatsip aluminiumik atuisarnera annertusisimammat. Nunani Kinamisut  Indiamisullu amerlasoorsuarnik innuttaqartuni,  annikitsuinnarmillu aluminiumik atuiffiusimasuni, aluminiumik suliffissuaqarnerup ineriatortinneqarnissaa periarfissagippoq. Illoqarfinnut annernut nutsernerit aamma inuuniarnermut periarfissat pitsanngornerisa inuiaqatigiillu amerliartornerisa kingunerissavaa aluminiumik atuinerulerneq.  Tassaniippoq aluminiumik suliffissuaqarnerup alliartortinneqarnissaanut periarfissaq.

Naak Asiami atuineq qaffakkaluartoq, ineriatornermullu periarfigissaarluni, tamanna isumaqanngilaq naassaanngitsumik ineriartortoqassasoq. Piffissap ingerlanerani Kina-p Indiallu pisariaqartitsinerat ulikkaassaaq, ineriartornerat ullumikkumut naleqqiullugu arriinnerulissaluni. Kinap nalunaarutigereerpaa illoqarfiit inerisarnerinut sanaartugassanut aningaasaliissutaasartut appartinniarlugit, atuisartullu inuinnartut pisariaqartitaat salliutilerniarlugit.

Taakku saniatigut atuisartut pillugit unammillertoqarpoq suliffissuaqarfinnit allanit soorlu plastikiliortunit , savimminissaliortunillu allanit soorlu kanngussaliortunit,  aammali tusarusiminarnerusutut  - aluminiumik atueqqittalernikkut.

Aluminiumik suliffissuit siunissami ineriartornissaat

Aluminiuliorluni suliffissuaqarnerup siunissani qanoq iliorluni qulakkiissavaa?

Aluminiu saffiugassaavoq ineriartortinneqarnissaminut periarfissaqartoq tassaniipporlu siunissamut ineriartornissaq. Oqaluttuarisaaneq isigigaanni aluminiumik suliffissuaqarneq nammineerluni ineriartortitassaminik ingerlatsisimanngilaq, ineriartoqqiffissaminillu ujaasisimanani. Maannali periarfissanik ujarlertoqalerpoq. Aluminiu oqitsuuvoq, atoqqikkuminartuulluni, sivisuumillu atasarluni, aluminiup pisinnaasai tamakku qitiutillugit  nioqqutissiassanik  nutaanik ineriartortitseqqittoqalerpoq.

Aluminiumik nioqqutissianik tunitsivissat nutaat nassaarineqarsinnaapput silaannakkut assartuisarnerni, seqernup qinngorneranik iluaquteqarniarnermi, elektronikkimillu ineriartortitsinermi, inuinnaat biililiuunnerini, kiisalu sanaartornermi atortussanik nutaaliornerni. Piumasaqaat tassaavoq suliffissuaqarnerup nutaaliortuarnissaa, nutaaliallu niuerfissanut nittarsaattuarnissaat. Tamanna iluatsikkiartulereerpoq aluminiup kanngussak inangeriartornamgu. Kanngussak oqimaannerullunilu akisuneruvoq, taamaattumik aningaasanik sipaartoqarsinnaavoq nioqqutissiarlu oqinnerussalluni aluminiu atoraanni.

Aluminiumik atuinerup aallaavigaa innuttaasut atugarissaarneruleriartornerat, aamma sanaartornikkut assartuisarnikkullu suliffissuaqarneq. Aluminiumik suliffissuaqarnerup sulissutigaa tunisassianut periarfissat  nutaat atorluarnerulernissaat. Taamaasilluni suliffissuaqarnerup qulakkeerniarpaa siunissaq ungasinnerusoq isigalugu ataavartumik ineriartortitsinissani.