Fjardaál-imi Suliniut
Alcoa-p Islandip kangiani aluminiumik aatsitsiviata, Fjardaálip, aluminiumik tunisassiornini 2007-mi aallartippaa, 2008-milu tamakkiisumik tunisassiulerluni, tassa ukiumut 346.000 tonsinik tunisassiorluni. Fjardaál isumaqarpoq ”kangerluup aluminiua”.
Alcoa Fjardaál aluminiumik aatsitivimmut tikilluaqqusilluni allagartaq (foto: Greenland Development)
Aluminiumik aatsitsiviup sanaartorneqarnera 2004-mi aallartippoq, kisianni suliniut piffissamik sivisunerusumik oqaluttuassartaqarpoq. Alcoap suliniut Norskit suliffeqarfiutaannit Hydro Aluminium-imit tigusimavaa, suliffeqarfiup taassuma aluminiumik aatsitsivimmik sanaartornissamut periarfissat ukiorpassuarni misissorsimavaat. 1990-ikkut ingerlaneranni Hydro Aluminiumip Islandip kangiani suliniut ingerlassimavaat, 1990-ikkullu naalerneranni suliniut ima siuarsimatigaaq allaat avatangiisinut sunniutissat nalilersorneqarnerat naammassisimallugu, tassa alloriarnerit kingulliit ilaat naammassineqarsimalluni suliniutip aallartinneqannginnerani. Hydro Aluminiumilli suliniut piviusunngortissinnaasimanngilaa.
Taamaasilluni Alcoa 2002-mi takkussimavoq, 2003-milu Island-imi naalakkersuisut Island-illu naalagaaffiata nukissiorfiutaa, Landsvirkjun, kallerup inneranik aatsitsivimmut tunioraasussaq, isumaqatigiissuteqarfigisimallugit. Taama pisoqareermat Alcoa 2003-mi nunani tamalaani entreprenøritut ingerlatsivik Bechtel, taakkulu Island-imi suleqataat HRV aatsitsivimmik sanaartornissamut isumaqatigiissummik atsioqatigiiffigisimavai.
Piffissami tassani Landsvirkjun erngup nukinganik nukissiorfiliorniarluni suliniut, Kárahnjúkar, sanaartortittussaavaa, tassa Fjardaál-imi aatsitsivimmut innaallagissamik tunioraasussaq.
Aluminiumik aatsitsivik aallarniutitut missingersuusianit 30 %-imik akisunerulluni 2007-ip ingerlanerani naammassivoq, 2008-milu tunisassiorneq tamarmiusoq aallartisarneqarluni, ullormut aatsitsiviit igaasat 2-4 aallartinneqartarlutik. Aatsitsivik igaasanik 336-nik peqarpoq, tulleriaallugit immikkoortunut marlunnut avinneqarsimasunik. Aatsitsivik aamma immikkut pisinnaasalimmik kuitsiveqarfeqarpoq, tassami tunisassiat assigiinngitsut assigiinngitsunik akullit tunisassiarisinnaagamigit, aluminiullu baarit kisiisa tunisassiarinagit. Tamatumalu saniatigut aatsitsivik piffissami tassani Alcoap aatsitsiviini nutaanerpaatut nunarsuatsinni angissutsini assingusuni tunisassiorluarnerpaat ilagisimallugu.
Fjardaál -imi inuit 450-it sinnerlugit sulisorineqarput, tamatumalu saniatigut aatsitsivimmut sullissisuni 350-it missaat sulisorineqarlutik. Tamatuma saniatigut Alcoa eqqoriaavoq, aatsitsivik tunngavigalugu hundred-inik arlalinnik Island-imi sulisoqartitsisoqartoq.
Fjardaál illoqarfiup Reydafjördur eqqaaniippoq, kangerluup qinnguani. Suliniut aallartinneqarmat illoqarfimmi innuttaasut 1000-it inorsimavaat. Suliniutip annertussusaa malinnaaffiginiarlugu illoqarfik taanna, nammineq kommunitut ingerlasoq, illoqarfeeqqat allat eqqaminiittut ataatsimooqatigilersimavai, kommunilu Fjardabyggd pilersissimallugu.
Annertunerusumik takusaqarsinnaavutit Alcoap Island-imi nittartagaani, aammalu Fjardabyggd kommunip nittartagaani.