Island-imiut Fjardaál-imi aluminiliorfimmut kiffartuussinermik isumagisaqartut
Aluminiumik aatitsivik suliffeqarfiuvoq angisoorujussuaq, taamaattumillu aamma ingerlatsinermini kiffartuussisussanik amerlasuunik pisariaqartitsisarluni. Taamaattumik aamma Alcoa Fjardaál kiffartuussisorpaalunnik suleqateqarpoq, piffimmit, nunap ilaanit, Island-imit aammalu nunanit allanit aggersunit.
Taamaattumik Alcoa Fjardaál-imut akilersinnaanerpaavoq, ukiuni arlalinni atuuttussanik kiffartuussinissamik isumaqatigiissuteqartarneq, tassami aatitsiviup ingerlanerani kiffartuussisoqarnissaq pisariaqartuassammat. Tunisassiorneq aallartinngikkallarmat, kiffartuussisunngussallutik soqutiginnittunik Alcoa ataatsimeeqqateqallattaasarsimavoq, saqqummiiffigalugit piumasaqaatit suut pineqarnersut qanorlu isumagineqartassanersut isumaqatigiissuteqarfigineqassagunik.
Suliffeqarfik Fjardaál-imeersoq Launafl ehf (www.launafl.is) ukiuni 7–ni atuuttussamik Alcoa Fjardaál-imik kiffartuussinissamik isumaqatigiissuteqarsimavoq. Suliffeqarfiup ilaatigut isumagisassarivai aluminiliorfiup nunami angallassissutai assigiinngiiaartut aserfallatsaalissallugit, kran-inik aaqqissuussivimmi sulisoqartitsineq, illutaasa aserfallatsaaliorneqarnissaat sarfamut attaveqaatit ilanngullugit, imeqarnermut kiassarnermullu tunngasut (VVS), qalipaasoqarnermut tunngasut, sanasoqarnermut tunngasut taavalu silaannalersuuteqarnermut tunngasut. Tamatuma saniatigut sarfamut sakkortusaaveqarfik nillusaassuillu suliassanut ilaapput. Naggataatigut suliffeqarfiup aamma sanaartugassat taamatullu atortussanik tuniniaanerit kiffartuussinerillu allat isumagisarisarpai.
Suliffeqarfik kiffartuussinermik assigiinngitsutigut isumaginnittuusoq Alcoa-mik kiffartuussinissamut piukkunnarsarumalluni ajugaasinnaajumallunilu suliffeqarfinnit 6-usunit katitigaavoq. Tamannalumi iluatsilluarsimavaat, tassami Alcoa-p 2012-mi kiffartuussisussanit pisariaqartitaasa 90%-ii isumagisarilersimagamikkit. Suliassat ilaasa isumagineqarnissaat ajornanngitsumik suliariumallugit sulisuisa ilai Alcoa-mi suliffeqartarput, allalli suliffeqarfiup nammineq aaqqissuussisarfiani sulisuusarlutik.
2011-mi Launafl 120-t missiliorlugit sulisoqarsimavoq. Taakkunannga 15-t nunanit allaneersuussimapput, taamaattumillu suliffeqarfiup iluani island-imiusut tuluttullu attaveqatigiinnerit ingerlanneqartarlutik. Nunanit allaneersut ukiuni kingullerni siornatigumut (ukiut 2-3 matuma siornatigumut) sanilliullugu ikinneralaaranngorsimapput. Taamanikkummi nunanit allaneersut 60-t missaannik amerlassuseqarsimapput – tamatumunngalu pissutaanerusimalluni taamani Island-imi sulisussaaleqisoqarsimanera. 2008-mi nunani assigiinngitsuni aningaasarsiornikkut ajornartorsiuteqartoqalermat, nunanit allanit suliartorsimasut ikigisassaanngeqisut aallakaasimapput. Tamatumunngalu aamma pissutaaqqataasimavoq, Island-imi akissarsiat pisissutaasinnaanerisa taamanikkut appariaateqangaatsiarsimanerat. Nunanit allaneersut suliarisimasaat massakkut Island-imeersunit isumagineqarnerulersimapput.
Suliffeqarfik pineqartoq ineriartortuarsinnarpoq, taamaattumillu piginneqataasimasut arlallit piginneqataassutaat pisiarineqartarsimallutik. Launafl ehf pillugu paasisaqarnerorusukkuit [una tooruk]
Sulisunik nerisaqartitsinissamut kiffartuussinissamik suliariumannittussarsiussinermi suliffeqarfik Lostæti Akureyri-minngaanneersup ajungaasimavoq. Taamaalilluni suliffeqarfiup taassuma aatitsiveqarfimmi nerisarfiup attartorneratigut nerisassanik ulloq unnuarlu sulisunut paarlagaattuartunut piareersaaneq ingerlattalersimallugu. Taamatut kiffartuussisalernertik iluatsillugu, Lostæti-p illoqarfimmi qanittumiittumi Reydarfjördur-imi iffiukkanik pisiniarfimmik ammaasinnaasimavoq, taannami iffiorfeerunnikuusimagaluarmat.
Fjardaál-imi aluminiliorfimmut kiffartuussinissamik isumaginnittuusartut kikkuunerinik ugguuna paasiniaasinnaavutit: [uani]