Suliniut pillugu paasissutissat

Kalaallit Nunaanni aluminiumik suliniut ataatsimik aluminiuliorfimmik marlunnillu erngup nukinganit sarfaliortussanik nukissiorfeqassaaq, taakkununngalu atatillugit sanaartugassat allat sanaartorneqassallutik. Sanaartugassani allani pineqarput innaallagissap aqqutaa, erngup nukinganit nukissiorfinniit aluminiuliorfimmut, aammalu aluminiuliorfimmi umiarsualivik.

Maniitsup qeqertaa. Qorsuk tassaavoq Maniitsup illoqarfia, aappaluttoq illoqarfiup ilassaatut pilersaaruteqarfiuvoq, tungujortorlu tassaalluni aatsitsiveqarfissatut pilersaarfik. (Takussutissiaq: Qeqqata Kommunea)

Suliniut aluminiumik tunisassiorfiussaaq. Aluminiumik tunisassiornissamut atortussiaq, aluminiumsoxid, nunanit aluminiumik akuiaavinniit Kalaallit Nunaannut umiarsuakkut tikisinneqartassaaq. Atortussiarlu aluminiumsoxid pinngortinneqartarpoq aatitassaq bauxit akuiarneratigut.   

Erngup nukinganit nukissiorfiit marluk tatsinik qutsissuniittunik pioreersunik imermik pilersorneqassapput. Tatsit taakku marluk meterinik 6-700-nik qutsittigisumi inississimapput. Tatsit pioreermata annikitsuinnarnik sapusiortoqassaaq. Nunani allani takuneqartarput tatsip qaavata sumiiffia portussusaa annertuliniarlugu angisuunik sapusiortoqartarnera. Uanili pilersaarutaavoq erngup nukinganit tukissiorfittassaat qaqqap iluani inissisimassasut, soorlu Kangerluarsunnguani Nuup eqqaaniittumi aammalu erngup nukinganit nukissiorfik Sisimiut eqqaaniittoq, isaariaanilu taamaallaat takuneqarsinnaalluni sanaartukkat ilamernat.

Utoqqarmiut Kangerluarsunnguanni erngup nukinganik innaallagissiorfik. (Assi: Nukissiorfiit)

Aluminiuliorfik amerlasuunik sulisoqassaaq, saniatigullu tunisassiorneq aallartippat kiffartuussinissamut suliffeqarfiit assigiinngitsut tunisassiornermut attuumassuteqassallutik. Imatut oqaatigalugu, suliffissuaqarfik piffimmi suliffeqarfinnut sulisoqarnerulernikkut kinguneqartitsissaaq, arlaatigut suliffissuarmut pilersuisutut, eqqiaanikkut, nerisaqartitsinikkut imaluunniit arlaatigut kiffartuusinikkut. Taamaattumik suliniummi pingaaruteqarpoq Maniitsoq allilerneqarnissaa, inissianik suliffeqarfinnullu allanik inissanik, illoqarfittaamik nutaamik sanasoqarnissaa.